Bu gün Xiaomi şirkətinin qlobal bazar üçün keçirdiyi təqdimat tədbirində yeni Xiaomi 12T seriyası təqdim edilib. Əvvəlcədən bildirdiyimiz kimi yeni Xiaomi 12T seriyası Redmi K50 Ultra modeli üzərinə inkişaf etdirilib. Xiaomi 12T modeli texniki cəhətdən Redmi K50 Ultra modelindən fərqlənsə də, görünüş cəhətdən birə-bir eynidir. Lakin Xiaomi 12T Pro modeli həm texniki, həm xarici görünüş cəhətdən bəzi xırda dəyişiklikləri özündə birləşdirir. Bu xırda dəyişiklik 12T Pro modelinin kamera modulunda ikinci bir çıxıntının olmasından qaynaqlanıb. Redmi K50 Ultra və ya Xiaomi 12T ilə müqayisədə Xiaomi 12T Pro modeli daha böyük sensor ölçüsünə, həmçinin təsvir ölçüsünə sahib 200MP ISOCELL HP1 ilə təchiz edildiyi üçün şirkət çıxıntını böyütməli olub. Nəticədə xarici görünüş cəhətdən Xiaomi 12T Pro modeli kamera modulunun daha qalın olması ilə fərqlənib. Ümumilikdə isə smartfonların dizayn və gövdə ölçüsü cəhətdən bütün elementləri, o cümlədən ümumi dizayn elementləri dəyişməyib.
Xiaomi 12T seriyası nə vəd edir?
Smartfonların texniki xüsusiyyətlərindən danışmağa başlayaq. İlk növbədə hər iki cihaz Xiaomi 11T seriyası ilə müqayisədə daha keyfiyyətli ekran paneli alıb. Xiaomi 12T seriyası modellərinin hər birinə 6.67 düymlük 1.5k (2712×1120 piksel) təsvir ölçülü 120Hz tezlikli ekran paneli quraşdırılıb. Adaptiv olaraq 30Hz və 120Hz arasında tezliyi dəyişə bilən ekran paneli, həmçinin 480Hz sensor tezliyi də vəd edir ki, oyunlarda və.s olduqca həssas hissiyat yaşadacaq. Dolby Vision, P3 rəng qamutu, True Display, SGS göz sertifikatı, 4096 səviyyəli detallı parlaqlıq xüsuiyyəti, rəng kalibrasiyası və.s kimi vacib detalları özündə birləşdirir. Maksimum parlaqlığı 1200 nit olan ekran Gorilla Glass 5 ilə qorunur. Barmaq izi sensoru da ekrana inteqrasiya edilib.
Xiaomi 12T Pro modeli öz gücünü Snapdragon 8+ Gen 1 çipsetindən alır. Buna qarşılıq Xiaomi 12T modelinə Dimensity 8100-Ultra çipseti quraşdırılıb. “Ultra” uzantısı sizi yanıltmasın, çipset normal Dimensity 8100 ilə eynidir. Sadəcə cüzi süni intellekt təkmilləşdirmələri ilə Xiaomi şirkəti çipsetin sonuna “Ultra” sözünü əlavə edib. Hər iki cihaz LPDDR5 və UFS 3.1 yaddaş texnologiyalarına da sahibdir. Performans cəhətdən xüsusilə Xiaomi 12T Pro modelinə Xiaomi 11T Pro ilə müqayisədə 65% daha böyük buxar qazanı və 125% daha böyük termal səth quraşdırılıb. Nəticədə performans xeyli yüksək və stabil olmalıdır.
Smartfonların kamera göstəriciləri
İndi isə Xiaomi 12T seriyası modellərindəki kameralar barədə danışmağa başlayaq. İlk növbədə hamınız sevinə bilərsiniz, çünki hər iki cihazın kamerasında OIS stabilizatoru mövcuddur. Xiaomi Mi 10T seriyasında olan OIS xüsusiyyəti, Xioami 11T seriyasına keçid edildikdə yığışdırılmışdı. Lakin bu dəfə hər iki cihazda bu xüsusiyyətin quraşdırılmasından şirkət çəkinməyib.
Xiaomi 12T Pro modelinə 1/1.22 düymlük 200MP ISOCELL HP1 kamera sensoru quraşdırılıb. Əsas kameranın görüntü keyfiyyəti həm 200MP ISOCELL HP1 sensoru, həm OIS dəstəyi, həm optimallaşdırılmış proqram təminatı ilə qeydlərə görə yaxşı kamera performansı verir. 4K keyfiyyətdə 60FPS, 8K keyfiyyətdə 24FPS video qeyd dəstəyi, RAW rejimi və əlavə xüsusiyyətləri ilə güclü bir iş ortaya qoyulub. Lakin digər 8MP 120° ultra-geniş bucaqlı və 2MP makro kamerası işləri korlayıb. Əsas kamera ilə digər kameralar arasında ciddi texniki fərq var və balans qorunmayıb.
Xiaomi 12T modelində isə 1/1.67 düymlük sensor ölçüsü cəhətdən əhəmiyyətli dərəcədə kiçik 108MP ISOCELL HM6 kamera sensoru işlədilib. Qeyd edək ki, sensor ölçüsü dedikdə MP yox, sensorun fiziki olaraq böyüklüyü nəzərdə tutulur. Təsvir ölçüsü dedikdə isə MP dəyərindən bəhs edirik. Bunu qarışdırmamağınız üçün kameralar ilə bağlı yazdığımız məqaləni oxumağı məsləhət görürük. Bu cihaz çox təəssüf ki, 4K keyfiyyətdə maksimum 30FPS video qeydlər almağı bacarır. Texniki cəhətdən Redmi K50 Ultra tamamilə eyni kamera xüsusiyyətlərinə sahibdir. Ona görə də 8MP və 2MP digər köməkçi kameralar standart olaraq bu cihazda da mövcuddur. Sonda qeyd edək ki, hər iki cihazın 20MP təsvir ölçülü selfi kamerası 1080p keyfiyyətdə 60FPS video qeydlər almağı bacarır.
Smartfonların digər texniki xüsusiyyətləri və qiyməti
Yeni Xiaomi 12T seriyası modellərinin hər birində 5000 mAs həcmli 120 Vatt sürətli şarj dəstəkləyən batareya quraşdırılıb. Tam şarj müddətinin 19 dəqiqə olduğu bildirilir. Smartfonlar həqiqi stereo dəstəkli Harman Kardon səs ucaldanlara və Dolby Atmos səs sertifikatına malikdirlər. Android 12 üzərində MIUI 13 ilə qutudan çıxır. 3 il Android, 5 il təhlükəsizlik yeniləməsi vəd edilir. Əslinə qalsa Android 13 ilə qutudan çıxması daha məntiqli olan cihazların Android 12 ilə qutudan çıxması 3 illik Android yeniləmələrini biraz mənasız edib.
Smartfonların qiymətinə gəldikdə Xiaomi 12T modelinin başlanğıc qiyməti 599 €, Xiaomi 12T Pro modelinin başlanğıc qiyməti isə 749 € təşkil edir. Ötən illə müqayisə etsək Xiaomi 12T Pro modeli təqribi 1600 AZN səviyyələrindən, Xİaomi 12T modeli isə 1300 AZN səviyyələrindən qeyri-rəsmi mağazalarda əlçatan ola bilər. Lakin dəqiq bir şey var ki, qiymətlər biraz yüksək olacaq. Cihazlar barədə fikirlərinizi rəylərdə bizimlə bölüşə, eyni qiymətə hansı alternativlərin məntiqli olduğunu qeyd edə bilərsiniz.
