Nəhayət, uzun müddətdir gözlədiyimiz möhtəşəm qayıdış baş tutdu. 2020-ci ilin ikinci yarısında Qualcomm şirkəti Snapdragon 8XX seriyasının istehsal prosesini Samsung şirkətinə ötürmüşdü. Bundan sonra çıxmış ilk flaqman çipset olan Snapdragon 888 həddindən müxtəlif problemlərlə xatırlanır. Çipsetin performansı möhtəşəm mühəndislik sayəsində inanılmaz səviyyələrə yüksəlmişdi. Lakin isinmə və yüksək enerji sərfiyyatı cəhətdən Snapdragon 888 çipseti çox əziyyət çəkirdi. Təəssüf ki, Snapdragon 888 öz dövründə bazarda rəqibsiz olduğundan qarşılaşdıra biləcəyimiz bir alternativ mövcud deyildi. O vaxta qədər ki, Mediatek flaqman çipset bazarına daxil oldu.
Ötən ilin sonu Mediatek şirkəti dünyanın ilk 4nm istehsal prosesli Dimensity 9000 mobil çipsetini tanıtdı. Bu çipsetin hamı üçün əhəmiyyətli olan xüsusiyyəti 4nm istehsal prosesinin TSMC-ə məxsus olmasında yaranır. Snapdragon 8 Gen 1 buna qarşılıq olaraq Samsung-a məxsus 4nm-lik texnoloji proses üzərinə inşa edilmişdir. Android ekosisteminə daxil olan bənzər texniki detallara sahib 2 flaqman çipset qarşılaşdırıldıqda maraqlı nəticələr ortaya çıxır. Dimensity 9000 çipseti eyni performans testlərində Snapdragon 8 Gen 1 ilə müqayisədə daha az enerji sərf edir. Bu səbəblə diqqətlər istehsal prosesinə yönəlir. Exynos seriyası çipsetlərdə də bənzər halın yaşanması, insanları Samsung şirkətinin 4nm istehsal prosesinin effektiv olmadığı qənaətinə gətirir. Snapdragon 8+ Gen 1 isə bizim bütün suallarımıza cavab tapmağa kömək olacaq.
Yeni Qualcomm Snapdragon seriyası çipsetlər hansı özəlliklərə malikdirlər?
Qualcomm Snapdragon 8+ Gen 1 barədə danışmağa başlayaq. Başda da qeyd etdiyimiz kimi bu çipset TSMC şirkətinin 4nm-lik istehsal prosesi üzərinə qurulub. Snapdragon 8 Gen 1 ilə müqayisədə CPU və GPU performansı 10% artdığı bildirilir. Lakin Enerji sərfiyyatı nə az, nə çox tam olaraq 30% azalmışdır. Şirkət indiyə qədər vatt başına performans dəyərinə təqdimat müddətində yer vermirdi. Çünki, vatt/performans dəyəri çipsetin səmərəliliyi barədə son nöqtəni qoyan hissədir. Çipsetin 1 vatt enerji sərf edərək nə qədər performans verdiyini göstərir. Qualcomm, indiyə qədər Snapdragon tarixindəki ən yüksək vatt/performans dəyərinin Snapdragon 8+ Gen 1 çipsetində olacağını bildirib.
Çipset 1 ədəd 3.19GHz tezlikli Cortex-X2, 3 ədəd 2.75GHz tezlikli Cortex-A710, 4 ədəd 2.02GHz tezlikli Cortex-A510 nüvələrinə sahibdir. Qrafik çipi Adreno 730-dur. Tezliyi naməlumdur. Təqribi 900MHz olduğunu söyləyə bilərik.
- 1 x Cortex-X2 (3.19GHz)
- 2 x Cortex-A710 (2.75GHz)
- 4 x Cortex-A510 (2.02GHz)
İstifadə edildiyi smartfonda 16GB-a qədər LPDDR5 operativ yaddaşın işlədilməsi mümkündür. Operativ yaddşın tezliyi maksimum 3200MHz-ə qədər sazlana bilər. 200MP təsvir ölçülü kamera sensorlarının istiadəsini dəstəkləyir. 8K keyfiyyətdə 30FPS-ə qədər, 720p keyfiyyətdə 960FPS-ə qədər (yavaşladılmış) görüntülər qeydə ala bilir. HDR10+, Dolby Vision, HLG video formatları üçün dəstək mövcuddur. 4K ekran panellərinin 60Hz tezlikdə, QHD+ ekran panellərinin 144Hz tezlikdə işlədilməsi mümkündür. İşlədilmiş ekran panelinə görə 10bit rəng dərinliyi təqdim edir. 10Gbps-ə qədər yükləmə etmə imkan verən Snapdragon X65 5G modemi mövcuddur. Əlavə olaraq Wi-Fi 6, Bluetooth 5.3 kimi detallarla təmin edilib.
Qualcomm Snapdragon 7 Gen 1 çipseti təəssüf ki, TSMC tərəfindən istehsal olunmayacaq. Şirkət bu çipsetin hazırlanmasında Samsung ilə işləməyə davam edir. Belə ki, Snapdragon 7 Gen 1 çipseti Samsung-un 4nm-lik istehsal prosesinə əsaslanır. Nüvə düzülüşü 1+3+4 şəklindədir. Yüksək performans nüvəsinin tezliyi çox yüksək olmasa da bu cür fərqlilik müəyyən qədər müsbət təsir edəcək. 1 ədəd Cortex-A710 nüvəsi 2.4GHz tezlikdə işləyərkən, 3 ədəd Cortex-A710 nüvəsi 2.36GHz tezlikdə işləyəcək. Yerdə qalan 4 ədəd Cortex-A510 nüvələrinin tezliyi 1.8GHz olacaq. Qrafik çipi Adreno 662-dir və tezliyi məlum deyil.
- 1 x Cortex-A710 (2.4GHz)
- 3 x Cortex-A710 (2.36GHz)
- 4 x Cortex-A510 (1.8GHz)
Snapdragon 778G ilə müqayisədə GPU performansı 20% artıb, süni intellekt isə 30% sürətlənib. Bu çipset də 3200MHz tezliyə qədər 16GB LPDDR5 operativ yaddaşın işlədilməsinə icazə verir. İstifadə olunan Spectra ISP görüntü emalı çipi 200MP-ə qədər kamera işlədilməsini mümkün edir. Lakin Dolby Vision çip səviyyəsində dəstəklənmir, emal gücü daha aşağıdır, maksimum 480FPS yavaşladılmış görüntü qeydə ala bilər və.s. Snapdragon 778G ilə müqayisədə güclüdür, amma normal olaraq Snapdragon 8+ Gen 1 çipsetindən zəifdir. Ekran panellərinə verilən dəstək isə Snapdragon 8+ Gen 1 ilə eynidir. 5G modemi Snapdragon X62 və 4.4Gbps maksimum yükləmə sürətinə malikdir. Wi-Fi 6, Bluetooth 5.3 kimi detallar bu çipsetdə də qorunub. Qualcomm Quick Charge standartı 4+ olub, Snapdragon 8+ Gen 1 çipsetindəki 5.0 versiyasından geri qalır. Yeni nəsil Qualcomm Snapdragon seriyası çipsetlərə sahib cihazlar yaxın həftələrdə satışa çıxarılacaq.
