Fosil enerji sərmayələrini artıran, dəniz külək stansiyaları layihələrini ləğv edən və elektrikli avtomobillər üçün təşviqləri aradan qaldırmağa hazırlaşan Tramp administrasiyası indi də avtomobillərdə start-stop texnologiyasına müharibə elan edib. Trampın təyin etdiyi EPA (Birləşmiş Ştatlar Ətraf Mühitin Mühafizəsi Agentliyi) rəhbəri Li Zeldin, X şəbəkəsində maraqlı bir paylaşım edərək start-stop sistemini hədəf alıb.
Zeldin bildirib ki, “Start-stop texnologiyası: O, avtomobilinizi hər qırmızı işıqda dayandırır ki, şirkətlər iqlimlə bağlı medallar ala bilsinlər. EPA bunu təsdiqləyib və hamı buna nifrət edir, ona görə də biz bunu düzəldirik.” Xüsusilə ABŞ-ın nəhəng mühərriklərə və çox yüksək yanacaq sərfiyyatına malik avtomobillərlə dolu bir ölkə olduğunu nəzərə alsaq, Ətraf Mühitin Mühafizəsi Agentliyi adlı qurumun rəhbərinin belə bir bəyanatla çıxış etməsi olduqca ironik görünür. Ümumiyyətlə, Start-stop texnologiyası uzun müddətdir avtomobillərdə var. Texnologiyanın nəqliyyat vasitələrinə zərər verib-verməməsi mübahisəli olsa da, onun yanacağa qənaət etdiyi elmi şəkildə sübuta yetirilib.
Qısa bir xatırlatma olaraq, avtomobil işıqforun qırmızı işığında və ya tıxacda dayandıqda start-stop sistemi mühərriki söndürür. Sistemlər marka və modelə görə fərqli işləsə də, sürücü əyləc pedalını buraxdıqda əksəriyyət avtomatik olaraq mühərriki yenidən işə salır. Avtomobil istehsalçıları 20 ildən artıqdır ki, yanacaq qənaəti hədəflərinə nail olmaq üçün bu sistemi öz avtomobillərinə inteqrasiya edirlər. Aydındır ki, bu sistemlər səmərəliliyi artırır və karbon emissiyalarını azaldır. Məsələn, YouTube-da Engineering Explained kanalı tərəfindən aparılan sınaqlar göstərir ki, sistem real həyatda 4% – 8,7% arasında qənaət təmin edir. Bundan əlavə, yalnız 8 saniyəlik fasilənin belə yanacaq sərfiyyatını azaltmaq üçün kifayət qədər vaxt olduğu bildirilir.
