Səbirsizliklə gözlənilən Avatar filminin davamı olan “Avatar: Su Yolu”-nun nümayişindən əvvəl ilk Avatar filmi tamaşaçılara Avatar dastanını xatırlatmaq üçün yüksək keyfiyyətdə yenidən nümayiş olunacaq. Filmin yenidən nümayişi şərəfinə yeni treyler və poster də paylaşılıb.
James Cameronun Avatar filmi 2009-cu ildə tamaşaçılarla görüşdü və tezliklə bütün dünyada kassa rekordları qıraraq fenomen filmə çevrildi. İllər sonra gələcək davam filmi ərəfəsində, 2009-cu ildə yayımlanan ilk “Avatar” filmi 23 sentyabrda göz qamaşdıran 4K HDR formatında böyük ekrana qayıdır. Beləliklə, tamaşaçılar iki həftə ərzində kinoteatrlarda filmi yenidən izləmək şansı əldə edəcəklər.
Oskar mükafatı laureatı James Cameron tərəfindən yazılan və rejissorluq etdiyi filmdə baş rollarda Sam Worthington, Zoe Saldaña, Stephen Lang, Michelle Rodriguez və Sigourney Weaver çəkilib. Bu film “Ən Yaxşı Film” və “Ən Yaxşı Rejissor” daxil olmaqla doqquz Akademiya Mükafatına namizəd olub. “Ən yaxşı operator işi”, “Ən yaxşı istehsal dizaynı” və “Ən yaxşı vizual effektlər” mükafatı üzrə üç Oskar qazanıb.
Filmin dörd davamından birincisi olan “Avatar: Suyun yolu” filmi isə 16 dekabrda tamaşaçılarla görüşəcək. İlk filmdəki hadisələrdən təxminən on il sonra keçən film Sully ailəsinin hekayəsini, üzləşdikləri çətinlikləri, bir-birlərini təhlükəsiz saxlamaq üçün apardıqları mübarizəni, yaşamaq uğrunda mübarizələrini və yaşadıqları faciələrdən bəhs edir.
Şəxsi fikrimizə görə ilk filmin bu qədər böyük uğur və rəğbət qzanmasında əsas səbəblərdən biri həmin dövr üçün unikal bir iş hesab olunması idi. Çünki bu film həmin dövrdə bu tərz qrafiklərlə hazırlanan ilk filmlərdən idi. Lakin filmin ssenarisi və hekayəsinin də gücünü arxa plana atmaq olmaz. Uğurda bunların da böyük rolu var.
Həmçinin ikinci filmin bəhsi keçən treyleri ilə aşağıdakı videodan tanış ola bilərsiniz:
Bəs siz ikinci film haqda nə düşünürsünüz? Bu qədər ildən sonra ekranlara geri qayıdan film 2-ci hissəsi ilə yenidən böyük uğurlara imza ata biləcəkmi? Fikirlərinizi şərhlərdə bölüşə bilərsiniz.
