Azərbaycanda yeni startap studiyası – “Parvaz” fəaliyyətə başlayıb. Studiya məhsulun ilk versiyasını özü qurur, onu idarə edəcək təsisçini tapır və artıq məhsulu olan startaplara yeni bazarlara çıxmağa kömək edir. “Parvaz”ın təsisçiləri Aqşin Rəcəbov, Ayaz İbrahimov və Alastan Əsədzadədir.
Startap qurmaq üçün adətən iki şeydən biri çatışmır: ya ideya var, amma onu quracaq komanda yoxdur, ya da şirkəti idarə etmək istəyən insan var, amma sıfırdan başlamaq istəmir. “Parvaz” bu iki tərəfi birləşdirir. Studiya məhsulun ilk versiyasını (dizayn və kod) qurur, təsisçi ilə pay bölgüsünü razılaşdırır və şirkəti addım-addım ona təhvil verir. “Parvaz” şirkətdə pay saxlayır, təsisçinin payı isə zamanla ona keçir.
Studiyaya dörd yolla qoşulmaq olar: studiyanın qurduğu hazır məhsulu idarə etmək, öz ideyasını studiya ilə birlikdə qurmaq, artıq fəaliyyət göstərən startapla proqrama qoşulmaq və ya komanda üçün həmtəsisçi tapmaq. Hər komanda azərbaycanlı mühəndislərdən, məhsul mütəxəssislərindən və təsisçilərdən ibarət texnoloji icmanın mentorları ilə işləyir.
“Bizdə ideyası olan insanlar da var, şirkət idarə etmək istəyənlər də. Çatışmayan onları bir araya gətirən və məhsulu ilk gündən birlikdə quran bir yer idi. “Parvaz” bunun üçün yaradılıb. Növbəti addım komandalarımızın qonşu bazarlara tək yox, regiondakı tərəfdaşlarla birlikdə çıxmasıdır”.
Aqşin Rəcəbov, “Parvaz”ın təsisçisi
“Parvaz” startapların regiona çıxışı üçün Özbəkistandan Hayot Ventures, AloqaVentures və Startup Garage, Qazaxıstandan isə Astana Hub ilə əməkdaşlıq qurur. Bu əməkdaşlıqlar Azərbaycan startaplarına Mərkəzi Asiya bazarlarına həmin təşkilatların proqramları vasitəsilə daxil olmaq, regiondan olan startaplara isə “Parvaz” proqramı ilə Azərbaycan bazarına çıxmaq imkanı yaradır. Yaxın Şərq istiqaməti üzərində də iş gedir.
Studiyanın artıq üç layihəsi var: Stripe üzərində işləyən SaaS-lər və Shopify mağazaları üçün tərəfdaşlıq proqramı Komissio, süni intellektlə qurulmuş saytlar üçün fərdiləşdirmə həlli Rawuser və agentliklər üçün təklif proqramı PropCraft.
“Parvaz”a müraciət parv.az/apply ünvanında açıqdır.
Parvaz haqqında
“Parvaz” startap studiyasıdır. Studiya məhsulun ilk versiyasını qurur, onu idarə edəcək təsisçini tapır və startaplara Mərkəzi Asiya və Yaxın Şərq bazarlarına çıxmağa kömək edir. Ətraflı: parv.az
Media üçün əlaqə
Rövşən, əməliyyat tərəfdaşı · hello@parv.az · parv.az · linkedin.com/company/parvaz-studio
