Çin sentyabrın 15–17-də kosmik fəaliyyətində diqqətçəkən nəticəyə imza atıb. Ölkə 45 saat ərzində üç fərqli buraxılış məntəqəsindən dörd müxtəlif raketi kosmosa göndərib. Məlumata görə, bütün missiyalar uğurla tamamlanıb və orbitə ümumilikdə 30 peyk çıxarılıb.
İlk buraxılış sentyabrın 15-də LandSpace şirkətinin Zhuque-2E raketi ilə həyata keçirilib. Jiuquan Peyk Buraxılış Mərkəzindən havalanan raket Qianfan genişzolaqlı internet şəbəkəsi üçün 10 peyki aşağı Yer orbitinə daşıyıb.
Zhuque-2E maye metan və maye oksigenlə işləyir. Bu yanacaq kombinasiyasından SpaceX-in Starship raketində də istifadə olunur. Starlink-ə rəqib kimi hazırlanan Qianfan layihəsi çərçivəsində təxminən 15 min peykdən ibarət internet şəbəkəsinin qurulması hədəflənir.
İkinci buraxılış sentyabrın 16-da Orienspace şirkətinin Gravity-1 raketi ilə baş tutub. Şanxay sahillərindəki dəniz platformasından havalanan raket Qianfan şəbəkəsinə daha doqquz peyk əlavə edib. Gravity-1 yüksək başlanğıc itələmə qüvvəsinə malik bərk yanacaqlı raket kimi tanınır.
Üçüncü missiya sentyabrın 17-də dövlətə məxsus China Aerospace Science and Technology Corporation (CASC) şirkətinin Long March 12 raketi ilə həyata keçirilib. Haynan adasındakı Wenchang Kosmik Buraxılış Mərkəzindən göndərilən raket SatNet internet şəbəkəsi üçün doqquz peyki orbitə çıxarıb. Bu layihənin gələcəkdə təxminən 13 min peykdən ibarət olması planlaşdırılır.
Sonuncu buraxılış həmin gün Kuaizhou-11 raketi ilə Jiuquan mərkəzindən həyata keçirilib. Raket Spacety şirkətinə məxsus iki radar əsaslı Yer müşahidə peykini kosmosa daşıyıb.
Beləliklə, Çin 45 saat ərzində həm özəl, həm də dövlət şirkətlərinin iştirakı ilə dörd orbital missiyanı tamamlayıb. Buraxılışların 28 peyki internet şəbəkələri, ikisi isə Yerin radar vasitəsilə müşahidəsi üçün nəzərdə tutulub.
