Geely elektrikli avtomobillər üçün yeni nəsil ultra sürətli şarj texnologiyasını sentyabrın 23-də təqdim edəcək. Şirkətin açıqlamasına görə, yeni sistem maksimum 2,2 MVt şarj gücünə çata və avtomobili cəmi dörd dəqiqə ərzində enerji ilə təmin edə biləcək.
Yeni texnologiyanın maksimum gücü BYD-nin 1,5 MVt-lıq Flash Charging 2.0 sistemindən təxminən 47 faiz yüksəkdir. Bununla belə, Geely dörd dəqiqəlik şarj müddətinin batareyanın hansı faiz intervalına aid olduğunu hələ açıqlamayıb. Buna görə də söhbətin, məsələn, 10 faizdən 80 faizə qədər, yoxsa tam şarjdan getdiyi məlum deyil.
Sistem 800 V elektrik arxitekturasını, 6C ultra sürətli şarj texnologiyasını və süni intellekt əsaslı batareya idarəetmə sistemini birləşdirir. Avtomobilin batareyasının vəziyyəti və enerji ehtiyacı analiz edilərək hər bir avtomobil üçün uyğun şarj strategiyası müəyyənləşdirilir.
Geely bildirir ki, bu yanaşma yüksək şarj sürətini qorumaqla yanaşı, batareyanın aşınmasını da məhdudlaşdıracaq. Təkmilləşdirilmiş istilik idarəetməsi elementlərin temperaturunu nəzarətdə saxlayacaq. Şirkətin məlumatına görə, batareyalar 3 500 şarj-boşalma dövrünü məhdud tutum itkisi ilə tamamlaya biləcək.
Yeni texnologiyanı əldə edən ilk avtomobil yenilənmiş Geely Galaxy E5 olacaq. Modelin mövcud 400 V və öndən çəkişli platforması 800 V və arxadan çəkişli arxitektura ilə əvəzlənəcək. Elektrik mühərrikinin maksimal gücü də 160 kVt-dan 245 kVt-a yüksəldiləcək.
Galaxy E5-də Geely-nin yeni nəsil Aegis Short Blade batareyalarından istifadə ediləcək. 61,52 kVt·saat və 70,01 kVt·saat tutumlu iki seçim müvafiq olaraq CLTC standartı üzrə 550 və 635 km yürüş ehtiyatı təmin edəcək.
Avtomobilin dizaynında da dəyişikliklər nəzərdə tutulub. Ön hissədə aktiv hava girişləri və L formalı dizayn elementləri istifadə olunacaq, kuzova inteqrasiya edilmiş gizli qapı tutacaqları isə ənənəvi mexaniki tutacaqlarla əvəz ediləcək.
