GDG Baku (Google Developers Group Baku), Holberton School Azerbaijan, İnnovasiya və Rəqəmsal İnkişaf Agentliyi (İRİA) və Azərbaycan İnnovasiya Mərkəzi (AIM) birgə təşkil etdikləri “MicroSaaS” Hakatonuna qoşulmaq üçün istedadlı proqramçılar, dizaynerlər və biznes analitiklərini tələsməyə çağırır!
Bu tədbir sizə cəmi bir gün ərzində real problemlərə həll tapan MicroSaaS məhsulları yaratmaq üçün unikal fürsət təqdim edir. Bu hakatona qoşulmaqla siz, kod yazmaqdan daha artığını, potensial yeni əlaqələr və öz performansınızı göstərmiş olursunuz.
Çünki, iştirakçılar tanınmış şirkətlərin üzləşdiyi konkret problemləri müəyyənləşdirməli və buna uyğun funksional proqram təminatı hazırlamalıdırlar. Bu, sizə qısa müddətdə işlək bir prototip yaratmaq və sahibkarlıq bacarıqlarınızı sınaqdan keçirmək imkanı verəcək. Tədbir boyu təcrübəli mentorların dəstəyi ilə yanaşı, biliklərinizi artıracaq informativ sessiyalardan da faydalanacaqsınız. Bu, ideyalarınızı təkmilləşdirmək və layihənizin potensialını maksimallaşdırmaq üçün əla bir yoldur.
Qalib olmasanız belə, yüksəliş imkanı sizi gözləyir
Qalib gələn komandalar dəyərli hədiyyələr qazanacaqlar, lakin bu hakatonun ən əhəmiyyətli faydası bundan ibarət deyil. Əgər layihəniz qalib seçilməsə belə, mentorlar tərəfindən bəyənilərsə, GDG Baku və AIM-in dəstəyi ilə akselerasiya proqramına daxil olmaq şansı əldə edəcəksiniz. Bu proqram ideyanızın inkişafı, biznes modelinin qurulması və gələcək investorlara təqdim edilməsi üçün sizə əlavə dəstək verəcək.
Yaradıcılığınızı göstərmək, portfelinizə güclü bir layihə əlavə etmək və gələcək karyeranız üçün dəyərli əlaqələr qurmaq üçün bu fürsəti qaçırmayın. Maraqlanan şəxslər qeydiyyatdan keçmək və hakaton haqqında ətraflı məlumat əldə etmək üçün təşkilatçıların rəsmi səhifəsinə daxil ola bilərlər.
Holberton School Azerbaijan Azərbaycanda fəaliyyət göstərən və Silikon Vadisi standartlarında proqram təminatı təhsili verən beynəlxalq şəbəkənin filialıdır. GDG Baku, Google texnologiyalarına marağı olan yerli proqramçılar, dizaynerlər və texnologiya həvəskarlarını bir araya gətirən qrupdur. Azərbaycan İnnovasiya Mərkəzi (AIM) Azərbaycanda innovasiya və sahibkarlığın inkişafını dəstəkləyən təlim, mentorluq və infrastruktur xidmətləri təqdim edən mərkəzdir. Həmçinin, Azərbaycan Respublikasının İnnovasiya və Rəqəmsal İnkişaf Agentliyi (İRİA) ölkədə innovasiyaların və rəqəmsal inkişafın təşviqi və sürətləndirilməsi üzrə fəaliyyət göstərən dövlət qurumudur.
