Tesla ikinci nəsil Roadster elektromobilini yenidən təqdim etsə də, avtomobilin gələcəyi ilə bağlı qeyri-müəyyənliklər davam edir. Şirkətin rəsmi saytında yayımlanan rezervasiya müqaviləsinə əsasən, Tesla müştərilərə avtomobilin nə vaxt çatdırılacağına, hətta ümumiyyətlə təhvil verilib-verilməyəcəyinə zəmanət vermir.
The Drive nəşrinin məlumatına görə, yeni Roadster hələ də hazırlanma mərhələsindədir. Şirkət avtomobil üçün 250 min dollara qədər ilkin ödəniş tələb edə bilsə də, istehsal və çatdırılma tarixləri ilə bağlı konkret öhdəlik götürmür.
Rezervasiya edən şəxslər avtomobil istehsala buraxılacağı təqdirdə çatdırılma növbəsində təxmini yer əldə edirlər. Lakin müqavilədə bunun nə istehsal, nə də çatdırılma ardıcıllığına zəmanət verdiyi açıq şəkildə göstərilir.
Tesla yeni Roadster-in istehsalına 2028-ci ildə başlamağı planlaşdırır. Bununla belə, şirkətin əvvəlki layihələrində yaşanan gecikmələr bu hədəflə bağlı suallar yaradır. Xatırladaq ki, ikinci nəsil Roadster ilk dəfə 2017-ci ildə nümayiş etdirilmişdi, lakin aradan keçən illər ərzində seriyalı istehsala başlanmayıb.
Avtomobilin yekun satış qiyməti də hələ müəyyənləşdirilməyib. Tesla bildirir ki, hazırlanma prosesi davam etdiyindən Roadster-in texniki xüsusiyyətləri, avadanlıq seçimləri və qiyməti dəyişə bilər. Müştərilər avtomobillərini fərdi konfiqurasiya etməyə dəvət olunduqda yekun qiymət açıqlanacaq.
Müqavilənin diqqətçəkən şərtlərindən biri rezervasiyanın başqa şəxsə ötürülməsinə icazə verilməməsidir. Bununla belə, Tesla bəzi əvvəlki xüsusi modellərində tətbiq etdiyi avtomobilin yenidən satışına dair məhdudiyyəti Roadster müqaviləsinə daxil etməyib.
Müştərilər üçün əsas üstünlük isə rezervasiya ödənişinin tam geri qaytarıla bilməsidir. Yəni avtomobilin istehsalı gecikərsə və ya alıcı gözləmək istəməzsə, ödədiyi məbləğin qaytarılmasını tələb edə bilər.
Yeni Roadster qeyri-adi texnologiyaları, o cümlədən avtomobilin havaya qalxmasına imkan verəcəyi iddia olunan sistemləri ilə diqqət çəkir. Lakin Tesla-nın rezervasiya şərtləri göstərir ki, iddialı texniki vədlərə baxmayaraq, modelin seriyalı istehsalı və müştərilərə çatdırılması hələlik qəti deyil.
