Çin, Tokionun yarımkeçirici istehsal avadanlıqlarının ixracını məhdudlaşdırmaqda ABŞ-a qoşulacağı təqdirdə Yaponiyanı ağır iqtisadi nəticələrlə hədələyib. Belə ki, Çin son dövrlərdə çip istehsalı avadanlıqları ixracını məhdudlaşdırmaq istəyən Yaponiyanı açıq şəkildə sanksiyalarla hədələyərək nə qədər ciddi olduğunu göstərib. Bloomberg-in mənbələrə istinadən verdiyi məlumata görə, Çinli məmurlar Yaponiyalı həmkarları ilə görüşlərdə dəfələrlə bu fikirləri səsləndiriblər.
Yaponiya iqtisadiyyatının sütunlarından biri olan Toyota yaranmış vəziyyətə xüsusi təcili reaksiya verib. Şirkət Yaponiyanın yeni sanksiyalara cavabının Çinin avtomobil istehsalı üçün lazım olan kritik minerallara çıxışını məhdudlaşdırmaq ola biləcəyindən ehtiyat edir. Toyota öz narahatlığını yapon rəsmilərinə özəl şəkildə bildirib və bu da qərarın qəbul edilməsində əsas amil ola bilər. Yarımkeçirici avadanlıq istehsalçısı Tokyo Electron-un maraqlarına Çinə qarşı planlaşdırılan ixrac tədbirləri də təsir göstərəcək. Qeyd edək ki, ABŞ uzun müddətdir ki, Yaponiyaya təzyiq göstərməklə və daha sərt ixrac nəzarəti axtarmaqla Çinin texnoloji inkişafını məhdudlaşdırmağa çalışır. Vaşinqton Yaponiyanın dəstəyi olmadan səylərinin daha az təsirli olacağından ehtiyat edir.
ABŞ rəsmiləri xüsusilə Çinin keçən il qalium, germanium və qrafit ixracını məhdudlaşdırdıqdan sonra kritik mineralların tədarükünü təmin etmək üçün Yapon həmkarları ilə görüşür. Yaponiya isə narahat olmaqda haqlıdır. Xatırladaq ki, 2010-cu ildə Şərqi Çin dənizində baş verən hadisədən sonra Çin Yaponiyaya nadir torpaq metallarının ixracını müvəqqəti olaraq dayandırmışdı və bu da Yaponiyanın elektronika sənayesinə ciddi zərbə vurmuşdu. Nəticədə, Çin və Yaponiya arasında münaqişə xəbərindən sonra Yapon çip şirkətlərinin səhmləri olduqca düşüb. Hətta Tokyo Electron səhmləri 1,9 faiz, Lasertec və Disco isə müvafiq olaraq 2,8 və 3,3 faiz ucuzlaşıb.
Yaponiyadakı bəzi ekspertlər hökumətin Vaşinqtonun göstərişlərinə əməl etməli olduğu fikrini rədd ediblər. Omdia analitiki Akira Minamikawa bildirib ki, “Yaponiya yalnız Birləşmiş Ştatlar belə bir tələb etdiyi üçün ixraca nəzarəti gücləndirməməlidir. Yaponiyanın öz fəlsəfəsi olmalı, ölkə üçün nəyin yaxşı olduğuna qərar verməli və möhkəm dayanmalıdır. Yenə də Bayden administrasiyası əmindir ki, Tokionun qorxularını aradan qaldıra və ilin sonuna qədər məsələ ilə bağlı razılığa gələ bilər”.
