Ötən həftə MediaTek şirkəti 2023-cü il üçün nəzərdə tutulmuş flaqmanlarda istifadə ediləcək Dimensity 9200 çipsetini təqdim etmişdi. Birbaşa Snapdragon 8 Gen 2 üçün rəqim olaraq hazırlanmış Dimensity 9200 təqdimatı ilə saytımızdan tanış ola bilərsiniz. İndi isə gələcək üçün bayraqdar çipset olacaq Snapdragon 8 Gen 2 çipseti barədə bəhs etməyə başlayaq. Nəticə etibarilə ən üst səviyyəli Android smartfonlar məhz bu çipset ilə təchiz ediləcəklər. Belə ki, Qualcomm şirkəti yeni nəsil Snapdragon 8 Gen 2 ilə birlikdə öz çipsetini tamamilə TSMC istehsal prosesi üzərinə hazırlayıb. Xatırladaq ki, ötən nəsildə Samsung texnoloji prosesi üzərinə hazırlanmış Snapdragon 8 Gen 1 çipseti Snapdragon 8+ Gen 1 üzərinə köçürülmüşdü. Lakin Snapdragon 8 Gen 2 çipseti birbaşa TSMC şirkətinin ikinci nəsil 4nm texnoloji prosesi ilə istehsal edilib.
Yeni Snapdragon 8 Gen 2 çipseti hansı xüsusiyyətlərə malikdir?
Qeyd etdiyimiz kimi TSMC şirkətinin N4P istehsal prosesi ilə ərsəyə gəlmiş çipset, ARMv9 arxitekturalı Cortex-X3 əsaslı nüvə quruluşunu özündə birləşdirir. Nüvə quruluşu isə biraz mürəkkəb alınıb. Yeni çipsetə 1 ədəd 3.2 GHz tezlikli Cortex-X3 nüvəsi, 2 ədəd 2.8 GHz tezlikli Cortex-A715 nüvəsi, 2 ədəd 2.8 GHz tezlikli Cortex-A710 nüvəsi və son olaraq 3 ədəd 2.0 GHz tezlikli Cortex-A510 nüvəsi quraşdırılıb. Lakin mənbələrə gedib baxdıqda nüvə quruluşunun “1+2+2+3” şəklində qeyd olunmadığını görə bilərsiniz. Bunun səbəbi 2.8GHz tezlikli nüvələrin 4 eyni klasterli performans nüvələri olaraq qeydə alınmasından qaynaqlanır. Nəticədə “1+4+3” nüvə quruluşuna sahib imiş kimi göstərilir.
- 1 x Cortex-X3 (3.2GHz)
- 2 x Cortex-A715 (2.8 GHz)
- 2 x Cortex-A710 (2.8 GHz)
- 4 x Cortex-A510 (2.0 GHz)
Qualcomm şirkətinin belə bir mühəndislik tətbiq etməsinin səbəbi ortalama performans tələb olunduqda Cortex-A715 əvəzinə, Cortex-A710 nüvəsini Cortex-A510 ilə birlikdə işlətməkdir. Bu halda ümumilikdə 2.8GHz tezlikli 4 performans nüvəsi eyni anda bir işin icrası üçün aktiv edilməyə bilər. Snapdragon 8 Gen 2 çipseti yeni nəsil Kryo nüvələri ilə 40% enerji sərfiyyatını azaldıb və 35% daha yüksək performans göstərib. Geekbench 5 testlərində bu çipsetin təkli nüvəsi 1483 xal, çoxlu nüvəsi isə 4709 xal toplayaraq Dimensity 9200 çipsetini qabaqlayıb. AnTuTu performans nəticəsi 1.293.410 xaldır.
Qrafik çipi tərəfində yeni nəsil Adreno GPU 25% daha yüksək performans vəd edir. Enerji sərfiyyatı isə 45% azalıb. Snapdragon 8 Gen 2 çipsetindəki yeni Adreno qrafik çipi Vulkan 1.3 (OpenGL ES 3.2) dəstəkləyən və eyni zamanda işıq izləməsi kimi bir çox xüsusiyyəti özündə birləşdirən ilk çipsetdir. Eyni zamanda oyunların 10 bit rəng dərinliyində göstərilməsi, daxili Dolby Vision dəstəyi kimi detallara da sahibdir. Əlavə olaraq qeyd edək ki, süni intellektin performansı isə 4,35 dəfə artıb və 1 vatt enerji sərf edərək 60% daha yüksək performans verir.
Samsung şirkətinin Galaxy S seriyasının qlobal səviyyədə Snapdragon 8 Gen 2 ilə satılacağını təsdiqləyən xəbəri sizinlə bölüşmüşdük. Bunu qüvvətləndirən bir əməkdaşlıq da ötən gün keçirilən sammitdə açıqlandı. Belə ki, Samsung ISOCELL 200MP HP3 sensoru üçün bu çipsetin xüsusilə optimizasiya edildiyi təqdimat tədbiri çərçivəsində vurğulanıb. Bu detal Galaxy S22 Ultra modelinin 200MP kamerası üçün də ön hazırlıq kimi qiymətləndirilir. Ümumilikdə Snapdragon 8 Gen 2 çipseti görüntü emalı cəhətdən o qədər güclüdür ki, 18 bit görüntüləri 200MP təsvir ölçüsündə qeydə ala bilər. 120FPS tezlikli 4K videolar, 30FPS tezlikli 8K HDR videolar (eyni zamanda 64MP-ə qədər şəkillər) qeydə alınması kimi xüsusiyyətlərə malikdir.
144Hz tezlikli QHD+ ekran panellərinin, 60Hz tezlikli 4K ekran panellərinin 10 bit dəstəyi ilə bu çipsetin işlədildiyi cihaza quraşdırılması mümkündür. Eyni zamanda AV1 formatı dəstəyi ilə ekstremal hallarda 8K keyfiyyətli 60FPS videoların işlənməsi mümkündür.
Snapdragon 8 Gen 2 çipseti Snapdragon X70 bağlantı modeminə sahibdir. Nəticədə 10GBps məlumat transferi sürəti, 6GHz tezlikli 5G bağlantısı dəstəyi, ikili 5G bağlantısı dəstəyi, WiFi 7 standartı (5.8GB/s maksimum sürət) kimi xüsusiyyətləri də özündə birləşdirir. SM8550-AB olaraq qeydə alınmış Snapdragon 8 Gen 2 çipseti demək olar qarşıdan gələn bütün Android flaqmanlarda quraşdırılacaq. İlk smartfon isə bu ilin sonuna qədər təqdim edilmiş olacaq.
