Almaniyanın avtomobil istehsalçısı BMW işçi sayını azaltmaq üçün yeni proqram həyata keçirməyə hazırlaşır. Şirkətin 2027-ci ilin sonuna qədər 8 min əməkdaşla yollarını ayırmağı planlaşdırdığı bildirilir.
Carscoops-un məlumatına görə, BMW bu məqsədə kütləvi məcburi ixtisarlar əvəzinə könüllü işdən ayrılma proqramı vasitəsilə nail olmağa çalışır. Şirkət bəzi əməkdaşlarına 650 min avronu aşan təzminat paketləri təklif edir.
Təzminat məbləği bütün işçilər üçün eyni deyil. Ödənişin həcmi əməkdaşın yaşından, şirkətdəki iş stajından və mövcud əməkhaqqından asılı olaraq fərdi qaydada hesablanır.
BMW əməkdaşların onlara təklif edilən təzminat məbləğini öyrənməsi üçün xüsusi onlayn portal da istifadəyə verib. Lakin ilkin mərhələdə sistemə maraq gözləniləndən yüksək olub. Çoxsaylı müraciətlər səbəbindən portalın fəaliyyətində texniki çətinliklər yaşandığı bildirilir.
Proqram çərçivəsində işdən ayrılmağa razılıq verən əməkdaşlara ödənişin alınması üçün bir neçə seçim təqdim olunur. Onlar təzminatı birdəfəlik və ya hissələrlə ala bilərlər.
Bundan başqa, vəsaitin pensiya yığım hesablarına köçürülməsi və ya sığorta proqramlarına yönəldilməsi də mümkün olacaq.
Şirkətin bu yanaşması işçi sayını azaltmaqla yanaşı, əməkdaşlara işdən ayrılma prosesində müəyyən maliyyə çevikliyi yaratmağa hesablanıb.
Bununla belə, 650 min avrodan yüksək təzminatın yalnız müəyyən əməkdaşlara təklif olunduğu bildirilir. Proqram üzrə orta ödəniş məbləği, hansı bölmələrin ixtisarlardan təsirlənəcəyi və ümumi xərclər barədə ətraflı məlumat açıqlanmayıb.
