2021-ci ildə azərbaycanlı Orxan Abdullayev, Emre talay və Nicolas Thouzeau tərəfindən təsis edilən Payrails startapı 14.4 milyon dollar dəyərində investisiya alıb. Qeyd edək ki, Payrails, investisiyanı yeni nəsil maliyyə əməliyyatları platforması olan FinOps üçün əldə edib. Maraqlısı budur ki, Payrails startapından əlavə General Catalyst, Andreessen Horowitz və HV Capital iştirak edib. Belə ki, EQT Ventures tərəfindən idarə olunan raundda məhz azərbaycanlı həmtəsisçisi olan Payrails investisiya alıb. Bununla da startapın topladığı ümumi investisiya məbləği 20.8 milyon dollar olub.
Ümumiyyətlə Payrails korporativ müştərilərə ödənişlər və maliyyə xidmətləri üçün platforma təklif edən fintech startapıdır. Startapın məqsədi yüksək inkişaf edən şirkətlərə qlobal miqyasda ödəniş qəbulu və maliyyə xidmətlərini qurmaq, idarə etmək və genişləndirməkdə kömək etməkdir. Startap bizneslərə ödənişlərini və maliyyə imkanlarını, o cümlədən ağıllı ödəniş marşrutu, konsolidə edilmiş pul əməliyyatları və ödənişlərin uzlaşdırılmasını idarə etmək üçün vahid API-dən istifadə etməyə imkan verən platforma təqdim edir. Həmçinin Payrails ilə müəssisələr maliyyə əməliyyatları üzərində daha çox nəzarət edə, ödəniş saxtakarlığını azalda və vahid analitika vasitəsilə ödənişlərin performansını izləyə bilərlər. Təşəbbüs bizneslər üçün mürəkkəb və parçalanmış ödəniş mühitini sadələşdirmək, onlara yeni ödəniş üsulları əlavə etmək, ümumi fəaliyyəti təkmilləşdirmək, requlyasiya tələblərini rahatlaşdırmaq məqsədi daşıyır.
Payrails startapı 14.4 milyon dollar investisiya aldıqdan sonra azərbaycanlı həmtəsisçisi və direktoru olan Orxan Abdullayev “Qarşıdakı səyahət üçün inanılmaz dərəcədə həyəcanlıyıq. Qlobal miqyasda ödənişlərin və maliyyə xidmətlərinin yaradılması, istismarı və miqyasının artırılması ilə bağlı saysız-hesabsız çətinliklərlə üzləşdiyimiz üçün biz biznesin ağrılı nöqtələrinə empatiya edirik” deyib.
