OpenAI mürəkkəb kompüter tapşırıqlarını daha sürətli və daha az xərclə yerinə yetirmək üçün GPT-6.1 Terra adlı yeni süni intellekt modelini təqdim edib. Şirkətin məlumatına görə, model bəzi peşəkar tapşırıqlarda GPT-6 Astra ilə müqayisəolunan nəticələr göstərsə də, təxminən 10 dəfə aşağı token xərci ilə işləyir.
GPT-6.1 Terra əsasən kompüter üzərindən həyata keçirilən çoxmərhələli işlərin avtomatlaşdırılması üçün hazırlanıb. Model vizual məlumatları təhlil edə, masaüstü proqramlarla işləyə, proqram kodu yaza və müxtəlif peşəkar tapşırıqları yerinə yetirə bilir.
Onun istifadə sahələrinə hesab-fakturaların emalı, texniki çertyojların təhlili, memarlıq layihələri əsasında üçölçülü modellərin hazırlanması və müxtəlif proqramlarda ardıcıl əməliyyatların avtomatlaşdırılması daxildir.
OpenAI bildirir ki, yeni model əvvəlki GPT-5.6 Terra ilə müqayisədə həm dəqiqlik, həm də proqramlaşdırma imkanları baxımından ciddi irəliləyiş əldə edib.
Bu fərq xüsusilə mürəkkəb peşəkar tapşırıqların qiymətləndirildiyi Agents’ Last Exam testində özünü göstərir. Orta səviyyəli düşünmə rejimində GPT-6.1 Terra əvvəlki modeldən 15 faiz bəndi daha yüksək nəticə göstərib. Bununla yanaşı, hər tapşırığın yerinə yetirilməsi üçün tələb olunan xərc təxminən üç dəfə azalıb.
Yeni modelin ən diqqətçəkən göstəricilərindən biri GPT-6 Astra ilə müqayisədə ortaya çıxıb. OpenAI-ın paylaşdığı nəticələrə əsasən, GPT-6.1 Terra sözügedən testdə GPT-6 Astra ilə oxşar performans nümayiş etdirir, lakin token başına təxminən 10 dəfə daha ucuz başa gəlir.
Sürət baxımından da əhəmiyyətli fərq var. Şirkətin məlumatına görə, GPT-6.1 Terra müəyyən tapşırıqları GPT-6 Astra və GPT-6.1 Sol modellərindən üç dəfədən çox sürətlə tamamlayır.
Ən yüksək düşünmə rejimində Claude Opus 5.5 ilə müqayisədə isə tapşırıq başına xərcin təxminən doqquz dəfə aşağı olduğu bildirilir.
OpenAI yeni modeldə yanlış məlumatların təqdim olunması probleminin də azaldıldığını açıqlayıb.
Şirkətin daxili qiymətləndirməsində GPT-5.6 Terra modelinin aşağı düşünmə rejimində səhv cavab faizi 53,6 olduğu halda, GPT-6.1 Terra-da bu göstərici 16,7 faizə enib.
Ən yüksək düşünmə rejimində isə yeni modelin səhv cavab faizi 4,3 təşkil edib. Bu, əvvəlki versiya ilə müqayisədə 18 faiz bəndi azalma deməkdir.
Proqramlaşdırma sahəsində də ciddi inkişaf qeydə alınıb. Süni intellekt agentlərinin terminal üzərindən texniki problemləri həll etmək bacarığını ölçən Terminal-Bench 4.0 testində GPT-6.1 Terra tapşırıqların 50,3 faizini uğurla tamamlayıb.
Əvvəlki GPT-5.6 Terra modelində bu göstərici 21,5 faiz idi. Beləliklə, yeni versiyanın uğur göstəricisi iki dəfədən çox artıb.
Bununla belə, OpenAI ən mürəkkəb proqramlaşdırma tapşırıqları üçün GPT-6.1 Sol və GPT-6 Astra modellərini tövsiyə etməyə davam edir. GPT-6.1 Terra isə daha çox sürət, qiymət və performans balansının vacib olduğu işlər üçün nəzərdə tutulub.
Məlumata görə, GPT-6.1 Terra oktyabrın 27-dən etibarən ChatGPT Work və Codex üzərindən Plus, Pro, Enterprise və Edu istifadəçilərinə təqdim olunur.
Proqramçılar isə yeni modelə OpenAI API vasitəsilə gpt-6.1-terra identifikatoru ilə qoşula bilirlər.
API qiymətləri də açıqlanıb. Bir milyon giriş tokenının qiyməti 1 dollar, keşlənmiş giriş tokenlarının bir milyonunun qiyməti 0,05 dollar, bir milyon çıxış tokenının qiyməti isə 5 dollar müəyyən edilib.
OpenAI bildirir ki, bu tariflər GPT-5.6 Terra və GPT-6.1 Sol modelləri ilə müqayisədə 50 faiz daha aşağıdır.
Yeni modelin əsas üstünlüyü süni intellekt agentlərindən geniş miqyasda istifadə edən şirkətlər üçün əməliyyat xərclərinin azalması ola bilər. Çünki belə sistemlər mürəkkəb tapşırıqları yerinə yetirərkən çoxsaylı əməliyyatlar həyata keçirir və böyük həcmdə token istifadə edir.
GPT-6.1 Terra-nın daha sürətli işləməsi və aşağı qiymət təklif etməsi isə şirkətlərə eyni büdcə ilə daha çox tapşırığı avtomatlaşdırmaq imkanı yarada bilər.
Qeyd edək ki, açıqlanan performans göstəriciləri OpenAI-ın təqdim etdiyi test nəticələrinə əsaslanır və real istifadə şəraitində tapşırığın növündən asılı olaraq fərqlənə bilər.
