Tesla avtomobil sahiblərinin şəxsi nəqliyyat vasitələrini robotaksi kimi istifadə etməsinə imkan verəcək sistemi istifadəyə verməyə hazırlaşır. Şirkətin planına əsasən, uyğun Tesla modelləri sürücüsüz şəkildə sərnişin daşıyaraq sahiblərinə gəlir qazandıra biləcək.
Tesla-nın üçüncü rüb üzrə maliyyə nəticələrinin müzakirəsi zamanı şirkətin avtonom idarəetmə üzrə vitse-prezidenti Aşok Ellusvami (Ashok Elluswamy) bu imkanın 2027-ci ilin ikinci rübündə təqdim oluna biləcəyini bildirib.
Onun sözlərinə görə, Tesla-nın xüsusi olaraq robotaksi xidməti üçün hazırladığı Cybercab və Model Y eyni avtonom idarəetmə proqramından istifadə edir. Şirkət bu texnologiyanı Full Self-Driving (FSD) sisteminin V15 versiyası ilə müştərilərə təqdim etməyi planlaşdırır.
Lakin şəxsi avtomobillərin robotaksi şəbəkəsinə qoşulması üçün təkcə proqram yeniləməsi kifayət etməyəcək. Avtomobillər Tesla-nın müəyyən etdiyi coğrafi ərazilərdə fəaliyyət göstərməli və şirkətin mərkəzləşdirilmiş robotaksi idarəetmə sisteminə inteqrasiya olunmalıdır.
Plan həyata keçirilərsə, Tesla sahibləri avtomobillərindən istifadə etmədikləri vaxtlarda onları sərnişin daşınmasına yönəldə biləcəklər. Beləliklə, avtomobil yalnız şəxsi nəqliyyat vasitəsi deyil, həm də əlavə gəlir mənbəyinə çevrilə bilər.
Əslində, bu ideya yeni deyil. İlon Mask hələ 2019-cu ildə Tesla Network adlı robotaksi şəbəkəsi yaratmaq planını açıqlamışdı. Həmin vaxt o, Tesla sahiblərinin avtomobillərini sürücüsüz taksi kimi işlədərək pul qazana biləcəklərini bildirmişdi.
Mask 2020-ci ilə qədər yollarda bir milyon robotaksinin olacağını da proqnozlaşdırmışdı. Lakin bu hədəf reallaşmadı və şəxsi Tesla avtomobillərinin robotaksi şəbəkəsinə qoşulması indiyədək geniş istifadəyə verilməyib.
Hazırda Tesla ABŞ-nin bəzi ərazilərində məhdud miqyasda robotaksi xidməti göstərir. Məlumata görə, şirkətin Texas və Florida ştatlarının müəyyən bölgələrində bir neçə yüz robotaksisi fəaliyyət göstərir. Onların bir hissəsində təhlükəsizliyə nəzarət edən əməkdaşlar hələ də mövcuddur.
Şirkətin Ostin şəhərində tam sürücüsüz Cybercab avtomobillərini də sınaqdan keçirdiyi bildirilir.
Bununla belə, şəxsi Tesla avtomobillərinin robotaksi kimi istifadəsinin qarşısında bir sıra texniki və hüquqi maneələr var. ABŞ-nin müxtəlif ştatlarında sürücüsüz sərnişindaşıma fəaliyyəti xüsusi icazələr tələb edir. Sığorta və qəza zamanı məsuliyyətin müəyyənləşdirilməsi də həll olunmalı məsələlər sırasındadır.
Digər problem avtomobillərin texniki imkanları ilə bağlıdır. Xüsusilə köhnə Model 3 və Model Y versiyalarının bəzilərində yeni nəsil avtonom idarəetmə üçün tələb olunan avadanlıq və hesablama gücü olmaya bilər.
Buna görə də 2027-ci ilin ikinci rübü hələlik gözlənilən başlanğıc dövrü kimi qiymətləndirilməlidir. Tesla hansı avtomobillərin, hansı bölgələrdə və hansı şərtlərlə robotaksi şəbəkəsinə qoşula biləcəyini tam açıqlamayıb.
