MediaTek şirkəti Snapdragon 8 Gen 2 çipseti üçün rəqib olan, həmçinin 2023-cü ildəki flaqman smartfonlarda işlədiləcək Dimensity 9200 çipsetini tanıdıb. Snapdragon 8 Gen 2 çipseti hələ təqdim edilmədiyi üçün, aralarında hansı fərqlər olacağını indidən deyə bilmərik. Lakin bu gün debüt etmiş Dimensity 9200 çipsetinin texniki detalları, o cümlədən sintetik testlər nəzərən performansı artıq məlumdur. Belə ki, Dimensity 9200 eynilə Apple A16 Bionic çipseti kimi TSMC şirkətinin ikinci nəsil 4nm texnoloji prosesi ilə istehsal edilib. Ötən il birinci nəsil 4nm istehsal prosesindən sonra, bu il 3nm istehsal prosesinə keçid edilmədiyi üçün çipset istehsalçıları 2023-cü il ərzində də yenilənmiş 4nm istehsal prosesi ilə qarşımıza çıxmağa davam edəcəklər.
Yeni MediaTek Dimensity 9200 çipseti hansı xüsusiyyətlərə malikdir?
Qeyd etdiyimiz kimi TSMC şirkətinin N4P texnoloji prosesi üzərinə qurulmuş çipset, ARMv9 arxitekturalı Cortex-X3 əsaslı nüvə quruluşuna malikdir. Uyğun olaraq 1 ədəd 3.0 GHz tezlikli Cortex-X3, 3 ədəd 2.85 GHz tezlikli Cortex-A715, 4 ədəd 1.8 GHz tezlikli Cortex-A510 nüvələrinə sahibdir. Tamamilə ARMv9 arxitekturasına sahib nüvə quruluşu və yenilənmiş 4nm istehsal prosesi hesabına Dimensity 9000 ilə müqayisədə ən yaxşı halda 25% daha az enerji sərf edib, 10% daha yüksək performans göstərir. Çipset daxilində tam olaraq 17 milyard tranzistor mövcuddur.
- 1 x Cortex-X3 (3.0 GHz)
- 2 x Cortex-A715 (2.85 GHz)
- 4 x Cortex-A510 (1.8 GHz)
Qrafik çipi olaraq isə olduqca güclü ARM Immoralis-G715 (MC11) işlədilib. İlk dəfə bu çipsetə quraşdırılan qrafik çipi 11 nüvəyə sahibdir. Nəticədə Manhattan 3.0 testlərində 41% daha az enerji sərf edib, 32% daha yüksək performans göstərir. Xüsusilə mobil oyunlarda Ray Tracing (işıq izləməsi), kölgələrin canlı və ya real zamanlı olaraq yaradılması kimi qrafik dəstəyinə malikdir.
MediaTek Dimensity 9200 çipsetinin test edildiyi prototip cihazın performansına baxdıqda AnTuTu V9 üzərində 1.260.161 xal toplayır. Geekbench 5.1.0 testlərində isə təkli nüvələrin performansı 1424 xal, çoxlu nüvələrin performansı 4471 xalla qiymətləndirilir. Snapdragon 8+ Gen 1 çipsetinə sahib ən güclü smartfon 1.112.697 xalla ASUS ROG Phone 6 olmuşdur ki, Dimensity 9200 çipsetinin performansı 12% daha artıqdır.
İndi çipsetin digər texniki detalları barədə danışaq. MediaTek şirkəti yeni Dimensity 9200 çipsetinə 6-cı nəsil neyron mühərrikini quraşdırıb. Nəticədə APU 690 ilə süni intellektin hesablama bacarığı 35% artıb, maşın öyrənməsi emalı isə 98% yüksəlib. UFS 4.0 dəstəkləyən çipset eyni zamanda yüksək tezlikli LPDDR5x (8.533 Mbps) operativ yaddaşı quraşdırılmasını mümkün edir. 144Hz WHQD ekran panellərinin, o cümlədən 240Hz tezlikli FHD+ ekran panellərinin bu çipsetə sahib cihazlarda quraşdırılması uyğundur.
Kamera performansı cəhətdən də bu çipset yeni nəsil Imagiq 890 ilə təchiz edilib ki, 34% daha az enerji sərf edir və RGBW sensorların quraşdırılmasını, 18-bit HDR görüntülərin işlənməsini, RAW faylların AI ilə emalını, 8K@30FPS videoların EIS ilə işlənməsini, 3D LUT və.s dəstəkləyir. Eyni zamanda Wi-Fi 7 dəstəyi ilə 6,5 Gbps sürətində şəbəkə dəstəyinə sahib ilk mobil çipsetdir. Bu çipsetin işlədildiyi cihazlar qarşıdakı həftələrdə təqdim olunacaq.
