Yaponiyanın avtomobil nəhəngi olan Honda, elektrikli avtomobil bazarı üçün yeni konsept elektromobili olan Honda e:N2-ni təqdim edib. Bu elektromobil keçən il təqdim olunmuş futuristik Honda e:N konseptual elektromobillərinin daha təkmilləşdirilmiş və yenilənmış versiyasıdır. Onu da qeyd edək ki, bu konsept elektromobilin seriya istehsalına uyğun versiyası yalnız Çin bazarında satışa çıxacaq. Yeni konsept elektromobil hetçbek və sedan xüsusiyyətlərini özündə birləşdirir. Elektromobilin ölçüləri açıqlanmasada onun Tesla Model 3, BYD Seal və Toyota bZ3 elektromobillərinə oxşar ölçüdə olması gözlənilir.
Honda e:N2 elektromobilinin eksteriyerinə nəzər saldıqda ön və arxa bamperlərin üfüqi LED xəttlərlə örtülmüş olduğunu görürük. Həmçinin elektromobilin kəskin eksteriyeri ona daha futuristik görünüş qatır. Həmçinin qara rəngli təkər diskləri elektromobilin eksteriyerini tamamlayır. Ön ötürməli “e:N Architecture F” arxitekturasında qurulmuş konsept elektromobil yeni nəsil Honda Sensing 360 ADAS sistemi ilə təchiz olunub. Bu sistem elektromobilin hər tərəfini əhatə edən 5mm-lik dalğa radarları ilə və ön kamera ilə sürücünün elektromobili idarəetməsini asanlaşdırır. Lakin təəssüf ki, konseptin batareya paketi və elektrik mühərriklərinin gücü barədə məlumat verilmir.
Konsept elektromobilin salonuna nəzər saldıqda maraqlı bir ekran diqqət cəlb edir. Belə ki, elektromobilin salonundakı ekran sönülü olduqda gizli vəziyyətdə olur. Mərkəzi panelə mövhumi olaraq inteqrasiya ediləcək ekran fiziki bir ekrandan fərqli bir görünüşə sahib olacaq. Məsələn, üstdə “H” loqotipini gördüyünüz hissədə fərqli məzmunların göstərilməsi mümkündür. Bunun necə işlədiyini səhifənin sonundakı videoda da görə bilərsiniz. Lakin hələ ki, bu yenilik konsept xaricində fiziki olaraq göstərilməyib. Digər diqqət çəkən dizaynlardan biri də düzbucaqlı sükandır.
Honda 2027-ci ilə qədər Çində 10 fərqli e:N seriyalı modeli həmçinin Honda e:N2 konseptinin seriya istehsalı versiyasını təqdim etməyi planlayır. 2030-cu ildən etibarən isə şirkət Çində yalnız hibrid və ya tam elektrikli avtomobillər satacaq. Bizə isə hələ ki, futuristik dizayna malik elektromobilin şəkillərinə baxmaq qalır.
