Texnologiyada Gələcək Nəsil Qadınların Gücləndirilməsi məqsədi ilə təşkil olunan “TechSHEroes” III bu il Landmark Hoteldə keçiriləcək!
Texnologiya sahəsində qadınların rolu və gələcəyini ön plana çıxaran “TechSHEroes” III tədbiri bu il üçüncü dəfə Matrix Academy-nin təşkilatçılığı və Girls Code platformasının ev sahibliyi ilə 17 may baş tutacaq. Tədbir qadınların texnologiya və innovasiya sahələrində gücləndirilməsinə, onların bacarıqlarının dəstəklənməsinə və gender bərabərliyinin təşviqinə həsr olunub.
Texnologiyada qadınların rolu mövzusuna dair panel müzakirələri tədbirin əsas hissəsini təşkil edəcək. Paneldə iştirak edəcək tanınmış texnoloji liderlər, sahə üzrə mütəxəssislər və yenilikçi qadınlar öz hekayələrini, peşəkar təcrübələrini və texnologiyadakı baxışlarını iştirakçılarla paylaşacaqlar.
Tədbirin diqqətçəkən məqamlarından biri isə həssas qruplardan olan yeniyetmə qızların və qadınların rəqəmsal bacarıqlarını nümayiş etdirən portfolio təqdimatları olacaq.
“TechSHEroes” təşəbbüsü qadınların rəqəmsal savadlılıq, proqramlaşdırma, texnologiya və digər sahələrdə iştirakını artırmaqla həm fərdi, həm də cəmiyyət miqyasında dayanıqlı inkişafa töhfə verir.
Tədbir bütün maraqlanan şəxslər üçün açıqdır və texnologiyaya marağı olan hər kəs, xüsusilə qadınlar və gənc qızlar üçün əhəmiyyətli fürsətlər təqdim edir. Ətraflı məlumat və qeydiyyat üçün Instagram səhifəsinə keçid edə bilərsiniz.
