Microsoft oyun kompüterlərinin optimallaşdırılması ilə bağlı hazırladığı Windows 11 dəstək səhifəsini rəsmi olaraq silib. Həmin sənəddə əksər oyunçular üçün 16 GB RAM-ın kifayət etdiyi, ən yeni AAA oyunlar və çoxsaylı modlardan istifadə edənlər üçün isə 32 GB RAM-ın ideal seçim olduğu qeyd edilirdi.
Şirkətin 2025-ci ilin noyabrında yayımladığı bu dəstək səhifəsinə artıq giriş mümkün deyil. Köhnə keçid hazırda Windows Learning Center ana səhifəsinə yönləndirilir. Sənədin arxiv versiyasına isə yalnız Wayback Machine vasitəsilə baxmaq mümkündür.
Mütəxəssislər hesab edirlər ki, bu addım süni intellekt yönümlü məlumat mərkəzlərinə artan investisiyalar fonunda yaranan qlobal yaddaş çatışmazlığı ilə əlaqəli ola bilər. Son aylarda DRAM yaddaş çiplərinin qiymətinin sürətlə bahalaşması videokartlar, ana platalar və digər kompüter komponentlərinin qiymətlərinə də təsir göstərib.
Diqqət çəkən digər məqam isə Microsoft-un son dövrdə 8 GB RAM-la təchiz edilmiş Surface noutbuklarını satışa çıxarmasıdır. Bununla yanaşı, şirkət Windows-un yaddaş istifadəsini daha səmərəli etmək üçün optimallaşdırmalar üzərində işlədiyini bildirir.
Microsoft-un baş icraçı direktoru Satya Nadella da yaxın zamanda Windows üçün daha çox yerli tətbiqin hazırlanması və proqram təminatının optimallaşdırılması istiqamətində işlərin davam etdiyini açıqlayıb. Sənaye analitiklərinin proqnozuna görə isə qlobal yaddaş təchizatındakı gərginlik 2027-ci, hətta 2028-ci ilə qədər davam edə bilər.
