Google-ın ana şirkəti Alphabet-in baş icraçı direktoru Sundar Piçay sosial şəbəkədəki paylaşımında Google DeepMind-da rəhbərlik dəyişikliyi edildiyini açıqlayıb.
Piçayın sözlərinə görə, Google DeepMind-ın həmtəsisçisi Demis Hassabis bundan sonra Google DeepMind-ın İdarə Heyətinin sədri və Alphabet-in baş elmi işçisi vəzifələrini icra edəcək. O, eyni zamanda Isomorphic Labs şirkətinə rəhbərliyini də davam etdirəcək.
Piçay bildirib ki, Hassabis yeni vəzifəsində əsas diqqətini süni ümumi intellektin (AGI) inkişafına, uzunmüddətli strategiyanın formalaşdırılmasına və elmi kəşflərin sürətləndirilməsinə yönəldəcək. Onun sözlərinə görə, bu istiqamət həm Alphabet, həm də bəşəriyyət üçün strateji əhəmiyyət daşıyır.
Digər dəyişiklik çərçivəsində Google DeepMind-ın texnologiya direktoru və baş süni intellekt memarı Koray Kavukçuoğlu şirkətin baş vitse-prezidenti vəzifəsinə təyin olunub.
Yeni vəzifəsində Kavukçuoğlu model hazırlanması proseslərinə, Google DeepMind-ın tədqiqat fəaliyyətinə, Gemini tətbiqinə və tərtibatçı komandalarına rəhbərlik edəcək.
Piçay vurğulayıb ki, Koray Kavukçuoğlu 13 ildir Google DeepMind-da çalışır. O, şirkətin dərin öyrənmə komandasını formalaşdırıb və WaveNet və DQN kimi mühüm süni intellekt texnologiyalarının yaradılmasında əsas rol oynayıb. Alphabet rəhbəri əlavə edib ki, Google DeepMind-ın gələcəyi etibarlı əllərdədir.
