YouTube, izləyici təcrübəsini və reklam əlaqəsini yenidən formalaşdıracaq yeni reklam formatını elan edib. Belə ki, “Peak Points” adlanan bu sistemdə artıq YouTube platformasında reklamlar videolardakı ən emosional və ya diqqəti cəlb edən yəni ən yaxşı anlardan dərhal sonra göstəriləcək. Yeni funksiya şirkətin Nyu Yorkda keçirilən “Upfront” təqdimatında təqdim edilib.
Qeyd edək ki, yeni formatın arxasında duran texnologiya Google-un Gemini adlı süni intellekt modelidir. Bu sistem YouTube videolarını təhlil edərək izləyicilərin ən yüksək marağının olduğu və ya emosional təsirin ən yüksək həddə çatdığı anları müəyyən edir. Sonra reklamların bu nöqtələrdən dərhal sonra görünməsini təklif edir. Bu strategiya, izləyicinin diqqətinin ən çox cəmləndiyi zaman reklamları göstərməklə reklamın yadda saxlanmasını artırmaq məqsədi daşıyır. “Emosiyaya əsaslanan hədəfləmə” kimi tanınan reklama bu yanaşma, izləyicinin emosional cəhətdən sıx bir təcrübə yaşadığı zaman reklamların daha təsirli olduğunu iddia edir.
Bu, reklamçılar üçün effektiv həll yolu kimi görünsə də, təcrübə izləyicilər üçün bezdirici ola bilər. Gözlənilən andan dərhal sonra gələn reklamlar emosional əlaqənin qurulduğu məzmun axınına mane ola bilər və ya təcrübəni daha da pisləşdirə bilər. Bununla belə, YouTube reklam strategiyasını yalnız diqqəti cəlb etmək üzərində qurmayıb. Platforma həmçinin istifadəçilərə daha interaktiv təcrübə əldə etməyə imkan verəcək yeni reklam formatını açıqlayıb. YouTube-un təqdim etdiyi başqa bir yenilik isə satın alına bilən məhsul lentidir. Bu yeni format sayəsində istifadəçilər reklamı izləyərkən məhsulları yoxlaya və birbaşa satın ala biləcəklər.
