Böyük Britaniyada yerləşən “Space Solar” texnoloji startapı kosmosdan Yerə naqilsiz enerji ötürülməsinin kritik sınaq prosesində mühüm uğur qazanıb. Şirkət 18 aylıq Cassidi layihəsi ilə kosmos əsaslı günəş enerjisinin texniki və iqtisadi səmərəliliyini sübut edib.
Space Solar-a görə, kosmosa yerləşdirilən günəş paneli Yerdəki ekvivalentindən 13 dəfə çox enerji istehsal edə bilər. Bunun əsas səbəbləri arasında gecə-gündüz dövrünün aradan qaldırılması və atmosfer itkiləri daxildir. Kosmosda daim günəş işığına məruz qalan panellər fasiləsiz enerji istehsalını təmin edir. Böyük Britaniyanın dövlət qurumları tərəfindən dəstəklənən 2,26 milyon dollarlıq Cassidi layihəsi Space Solar-ın kritik texnologiyalarını geniş şəkildə sınaqdan keçirib. Layihədə enerjinin kosmosdan ötürülməsi üçün hazırlanmış “Harrier” prototipi simsiz enerji ötürmə sınaqlarını uğurla başa vurub.
Layihənin nəticəsi olaraq şirkətin modul günəş enerjisi peyki olan Cassiopeia üçün 1700 səhifəlik alt sistem dizaynı hazırlanmışdır. Cassiopeia (Constant Aperture Solid State Integrated Orbital Phased Array) peyki minlərlə yüngül fotovoltaik modullar və əvvəlcədən hazırlanmış günəş reflektorları ilə təchiz olunacaq. Cassiopeia peyki topladığı günəş enerjisini yüksək tezlikli radiodalğalar vasitəsilə Yerdəki qəbuledicilərə naqilsiz ötürəcək. Bu ötürmə 360 dərəcə tam elektron şəkildə idarə oluna bilən və hərəkət edən hissələrə ehtiyac duymayan sistem tərəfindən təmin edilir. Bu yanaşma sayəsində enerji şüası aşağı intensivliklə, təhlükəsiz və hava şəraitindən təsirlənmədən çatdırıla bilər. Space Solar-a görə, bu texnologiya digər bərpa olunan enerji mənbələri ilə inteqrasiyada işləyərək şəbəkənin dayanıqlığını artıra bilər.
Qeyd edək ki, Space Solar qarşıdakı beş il ərzində kommersiya MVt miqyaslı sistem qurmağı və 12 il ərzində 30 MVt-dan GW-a qədər genişlənən məhsul çeşidini təklif etməyi hədəfləyir. 30 meqavat enerji təxminən 30.000 evi elektrik enerjisi ilə təmin edə bilər. Cassidi-nin uğurlu nəticələri kosmosa əsaslanan günəş enerjisi (SBSP) texnologiyasının 2030-cu ilə qədər kommersiya miqyasında tətbiq oluna biləcəyini göstərir.
