Sentyabrın 9-dan 14-dək Almaniyanın Münhen şəhərində dünyanın ən böyük və ən perspektivli mobillik tədbirlərindən biri olan IAA MOBILITY 2025 baş tutacaq. Bu il də Münhendə qlobal miqyasda istehsalçılar, təchizatçılar, texnologiya şirkətləri, startaplar və mobillik xidməti təminatçıları yenidən bir araya gələcək və sektorun gələcəyini formalaşdıran yenilikləri paylaşacaqlar.
Təbii ki, avtomobil sənayesinin nəbzi bu il yenidən Münhendə var gücü ilə döyünməyə hazırlanır. IAA MOBILITY klassik avtomobil şoularından kənara çıxır və bütün mobillik ekosistemini əhatə edən bir vizyon formalaşdırır. Tədbir yalnız məhsulların və həllərin nümayişi üçün bir yer deyil. Strategiya, texnologiya və davamlılığa əsaslanan qlobal müzakirə platformasıdır.
IAA MOBILITY 2025-in bu il dörd diqqət çəkən hissədən ibarət olması gözlənilir:
Messe München yarmarkalarında sənaye peşəkarları üçün B2B yönümlü sərgilər və görüşlər həyata keçiriləcək. Həmçinin tədbirin mərkəzində ictimai sərgi məkanları və təcrübə mərkəzləri mövcud olacaq. Tədbirdə mobillik və texnologiya dünyasının aparıcı simalarının iştirak etdiyi panellər və müzakirələr həyata keçiriləcək. Hətta bəlkə də bizi “test-drive” imkanları və yeni nəsil nəqliyyat vasitələri ilə daha yaxından tanış ola biləcəyimiz mühit gözləyir.
Bu il IAA MOBILITY 2025-də Mercedes-Benz-in tam elektriklə işləyən GLC EV modeli ilk dəfə təqdim olunması gözlənilir. Eyni zamanda, BMW, Audi, Hyundai, Huawei, Bosch, Continental və Qualcomm kimi qlobal brendlər yeni texnologiyalarını və əməkdaşlıqlarını elan edəcəklər. Çinin “Leapmotor” şirkəti Münhendə Avropaya genişlənmə strategiyasını da böyük bir ehtimalla elan edəcək. Çinlilərin məhz Avropa üçün bütün diqqətçəkən hədəflərini Münhendə sərgiləmək istəyəcəyi asanlıqla təxmin edilə bilən bir haldır.
IAA MOBILITY 2025 təkcə avtomobil sektorunu deyil, həm də texnologiya, telekommunikasiya, proqram təminatı və ictimai nəqliyyat subyektlərini əhatə edən multidissiplinar struktur təklif edir. Münhenin şəhər mərkəzi, vətəndaşların birbaşa təcrübə edə biləcəyi interaktiv ərazilər təklif edərək, günlərlə hərəkətliliyə həsr olunmuş ictimai məkanlara çevriləcək.
Ziyarətçilərin və mətbuatın akkreditasiyasına start verilib. Ətraflı proqram, spiker siyahısı və bilet haqqında məlumatı www.iaa-mobility.com saytında tapa bilərsiniz.
