İnnovasiya və Rəqəmsal İnkişaf Agentliyi (İRİA) və PAŞA Holding-in dəstəyi ilə Holberton School Azərbaycan tərəfindən təşkil edilən 100% təqaüdlü onlayn “Generative AI” (GenAI) proqramı uğurla yekunlaşıb.
Regionda ilk dəfə süni intellekt sahəsində praktiki kadr hazırlığına yönələn bu layihəni 3 ay ərzində uğurla tamamlayan 224 iştirakçı məzun adını qazanıb.
Qeydiyyat mərhələsində proqrama 1000-dən çox namizəd müraciət edib. Onların arasından xüsusi imtahan və müsahibə mərhələlərini uğurla keçən yüksək potensiallı şəxslər tam təqaüdlə onlayn “Generative AI” (GenAI) proqramına daxil olmaq hüququ əldə ediblər.
Holberton-un qlobal və layihəəsaslı metodologiyası iştirakçılara nəzəriyyədən uzaq, tamamilə real iş mühitində qarşılaşa biləcəkləri tapşırıqlar üzərində işləmək imkanı yaradıb. Bu 3 aylıq müddətdə iştirakçılar generativ süni intellekt texnologiyalarının biznes proseslərinə inteqrasiyası, model optimallaşdırılması və innovativ rəqəmsal həllərin qurulması istiqamətində dərin və praktiki təcrübə qazanıblar.
Holberton School Azərbaycan olaraq əsas hədəfimiz sadəcə bilik ötürmək deyil, əmək bazarında birbaşa axtarılan, şirkətlərin ehtiyac duyduğu peşəkar bacarıqlara sahib və real layihələrdə dərhal effektiv nəticə göstərə bilən mütəxəssislər yetişdirməkdir.
Proqram çərçivəsində təşkil olunan hakatonlar və birgə öyrənmə mühiti də iştirakçıların komanda işi və problem həll etmə kimi kritik korporativ bacarıqlarını formalaşdırıb. İRİA və PAŞA Holding-in strateji dəstəyi ilə reallaşan bu proqram, ölkəmizdə süni intellekt ekosisteminin güclənməsinə və şirkətlərin kadr potensialının artırılmasına birbaşa töhfə verir.
Proqramı müvəffəqiyyətlə başa vuran 224 məzun artıq süni intellekt həllərini müxtəlif sektorlarda tətbiq etməyə və rəqəmsal transformasiya proseslərinə çevik şəkildə inteqrasiya olunmağa hazırdır. Holberton School Azərbaycan olaraq, texnologiya dünyasına peşəkar addım atan bütün məzunlarımızı təbrik edir və onlara gələcək fəaliyyətlərində uğurlar arzulayırıq!
