Holberton School Azərbaycan, Sənaye və İnnovasiyalar üzrə Bakı Dövlət Peşə Təhsil Mərkəzi (SİBDPTM) ilə strateji əməkdaşlığa başlayır. Bu tərəfdaşlıq çərçivəsində əsas hədəfimiz ölkədə rəqəmsal ekosistemin inkişafını sürətləndirmək, qabaqcıl texnoloji biliklərin transferini təmin etmək və gənc builder-ləri qlobal standartlara uyğun hazırlamaqdır.
Silikon Vadisindən gələn praktiki və metodoloji yanaşmamız, mərkəzin nümayəndələrinə texnoloji sahədə unikal təcrübə qazanmaq imkanı yaradacaq. Birgə layihələr sayəsində iştirakçılar platformamızın əsas sütunlarından olan peer-to-peer metodu ilə tanış olacaq, real layihələr üzərində işləyərək praktiki vərdişlərini maksimal dərəcədə təkmilləşdirəcəklər.
Sənaye və İnnovasiyalar üzrə Bakı Dövlət Peşə Təhsil Mərkəzinin direktoru Şaban Cəərçiyev bu strateji addımı belə şərh edib:
“Bu əməkdaşlıq çərçivəsində süni intellekt, informasiya texnologiyaları, proqramlaşdırma və kibertəhlükəsizlik sahələrində beynəlxalq təcrübədən faydalanaraq peşəkar bilik və bacarıqlar inkişaf etdiriləcək. Qurulan tərəfdaşlıq innovativ yanaşmaların tətbiqinə və rəqəmsal bacarıqların gücləndirilməsinə mühüm töhfə verəcək”.
Gələcəyin Builder-ləri üçün Qlobal Metodologiya
2015-ci ildə Silikon Vadisində əsası qoyulan və hazırda ölkəmizdə İnnovasiya və Rəqəmsal İnkişaf Agentliyinin (İRİA) dəstəyi ilə fəaliyyətə başlayan Holberton School olaraq, iştirakçılarımıza tamamilə real layihə əsaslı öyrənmə modeli və mühiti təklif edirik.
SİBDPTM ilə reallaşan bu tərəfdaşlıq, yerli istedadların kəşf olunması və onların qlobal texnologiya arenasına inteqrasiyası istiqamətində növbəti böyük addımımızdır.
