Çin avtomobil istehsalçısı “XPeng”-in lüks seqmentə xitab edən və dizaynı ilə məşhur “Range Rover Sport” modelini xatırladan yeni “XPeng GX” krossoveri böyük ajiotaj yaradıb. Qlobal avtomobil bazarında səs-küyə səbəb olan bu model rəsmi olaraq satışa çıxarıldıqdan sonra cəmi 12 saat ərzində 24.863 sifariş toplayaraq öz vətənində inanılmaz bir başlanğıca imza atıb. Avtomobil mütəxəssisləri bu uğuru avtomobilin həm texniki göstəriciləri, həm də olduqca cəlbedici başlanğıc qiyməti ilə əlaqələndirirlər.
“XPeng GX” vizual olaraq ingilis lüks SUV ikonu hesab edilən “Range Rover Sport”un demək olar ki, birə-bir nüsxəsidir. Avtomobilin ümumi silueti, faralarının forması, gizli qapı tutacaqları və hətta bamperləri orijinal modelin dizayn dilini əks etdirir. Bu bənzərlik yalnız xarici görünüşlə məhdudlaşmır; interyerdəki kokpit quruluşunda və məlumat-əyləncə (infotainment) sisteminin yerləşməsində də eyni ab-havanı aydın şəkildə hiss etmək mümkündür.
Görünüşcə başqa bir avtomobili xatırlatsa da, XPeng GX-in kapotunun altındakı texnologiyalar olduqca iddialıdır. Avtomobil həm tam elektrikli (BEV), həm də mənzili uzadılmış (EREV) mühərrik variantlarında təklif olunur. Tam elektrikli versiya CLTC standartlarına əsasən 750 kilometrə qədər mənzil vəd edir, hibrid mühərrikli EREV versiyası isə bu rəqəmi fantastik 1.585 kilometrə qədər çatdırır. Modelin güc göstəriciləri 367 ilə 585 at gücü arasında dəyişir, batareya tutumları isə mühərrik növünə görə 63.3 kWh, 91.9 kWh və 110 kWh olaraq sıralanır.
Mayın 20-də kütləvi istehsalına başlanılan avtomobil 36.000 avrodan başlayan rəqabətədavamlı qiymət etiketi ilə təkcə Çində deyil, xarici bazarlarda da böyük maraq görür. Artıq Körfəz ölkələrindən bu model üçün 1.000-dən çox rəsmi satınalma tələbi daxil olub. Lakin, dizayn bənzərliyi və əqli mülkiyyət hüquqları ilə bağlı yaranacaq ciddi hüquqi maneələrə görə “XPeng GX”-in rəsmi şəkildə Avropa bazarına daxil olması gözlənilmir.
