Dünyanın ən böyük avtomobil bazarı olan Çində ənənəvi avtomobil istehsalçıları üçün çətin günlər davam edir. 2026-cı ilin may ayına olan son maliyyə göstəricilərinə görə, “Toyota” şirkətinin Çindəki satışları ötən ilin eyni dövrü ilə müqayisədə 31,7% azalaraq 102.300 ədədə geriləyib. Bu kəskin azalma ilə birlikdə brendin Çin bazarındakı satışları ardıcıl olaraq dördüncü aydır ki, mənfi tendensiya nümayiş etdirir və ən narahatedici məqam odur ki, eniş tempi aydan-aya daha da sürətlənir.
Bu böhranın əsas səbəbi kimi Çinli istehlakçıların daxili yanma mühərrikli avtomobillərdən sürətlə imtina etməsi göstərilir. Yerli Çin brendlərinin daxili bazarda yaratdığı aqressiv rəqabət fonunda, alıcılar kütləvi şəkildə elektrikli və hibrid modellərə üstünlük verirlər. Yaranmış yeni reallıq Toyota-nı da daxili strategiyasını dəyişməyə məcbur edib. Belə ki, may ayında Çində satılan hər 10 Toyota avtomobilindən 7-ni məhz hibrid və tam elektrikli modellər təşkil edib.
Şirkətin tam elektrikli (BEV) avtomobil satışlarında isə rekord artım qeydə alınıb. Toyota may ayında ötən ilin eyni dövri ilə müqayisədə iki dəfədən də çox artım nümayiş etdirərək 13.700-dən çox elektrikli nəqliyyat vasitəsi satıb. Bu sıçrayışın əsas hərəkətverici qüvvəsi isə markanın xüsusi olaraq Çin bazarı üçün hazırladığı və böyük maraqla qarşılanan yeni “bZ7” elektrikli sedan modeli olub. Bu rəqəmlər göstərir ki, yapon istehsalçısı mövqeyini qorumaq üçün tamamilə elektrikləşməyə köklənmək məcburiyyətindədir.
Çində pazar payı itirən yeganə yapon istehsalçısı Toyota deyil. Digər bir avtomobil nəhəngi “Honda” daha ağır böhranla üz-üzədir. Honda may ayında Çində cəmi 28.300 avtomobil sata bilib ki, bu da ötən illə müqayisədə 48,7%-lik böyük bir geriləmə deməkdir. Bununla da Honda Çin bazarında ardıcıl olaraq 28-ci ayını da xalis zərərlə və satışların azalması ilə başa vurub. Ekspertlər hesab edir ki, qlobal brendlər Çindəki yerli elektrikli avtomobil inqilabına eyni sürətlə cavab verməsələr, dünyanın bu ən böyük bazarından tamamilə silinmək təhlükəsi ilə qarşılaşacaqlar.
