Smartfonların performans reytinqini tərtib etməsi ilə tanınan məşhur AnTuTu resursu oktyabr ayı üçün olan siyahısını dərc edib. Bir çoxları üçün AnTuTu reytinqi əhəmiyyətini itirsə də smartfonların ortalama performansını təyin etməkdə bu platforma yaxşı nəticə ortaya qoymağı bacarır. Lakin hal-hazırda bazarda müxtəlif məqsədlər üçün smartfonlar çeşidləndiyindən, bu siyahıda birinci olan smartfon bəlkə də sizin qətiyyən işinizə yaramayacaq. Çünki, müxtəlif büdcələr üzrə lider smartfonlar ya oyun üçün nəzərdə tutulmuş cihazlar, ya da ekran və kamera cəhətdən zəif olub güclü çipseti ilə önə çıxan yüksək performanslı orta seqment modelləridir.
İlk olaraq 1000$ ətrafında dəyişən ən bahalı cihazları qeyd etməyə başlayacaq. Belə ki, AnTuTu siyahısının oktyabr ayı üzrə ən üst pillələrində ASUS ROG Phone 6 seriyası dayanır. Birinci yerdə ROG Phone 6 seriyasının Snapdragon 8+ Gen 1 və Dimensity 9000+ çipsetli variantları yer alır. Üçüncü yerdə yenidən Snapdragon 8+ Gen 1 çipsetli Red Magic 7S Pro və digər yerlərdə iQOO 10, iQOO 10 Pro, Legion Y70, OnePlus Ace Pro, Moto X30 Pro, Xiaomi 12S Pro qərarlaşır. Sonuncu yerdə isə ZTE şirkətinin Nubia Z40S Pro modeli mövcuddur.
Üstdəki şəkildən başlayaraq qiymət-performans reytinqi start götürür. İlk 3 modelin AnTuTu performansı görülərkən, daha aşağıda gələn modellərdə yalnız verdiyiniz məbləğ qarşılığında smartfonun performansına verilən reytinq göstərilir. Həmin nəticə isə 3 rəqəmli qiymətləndirmə ilə təyin edilir. 689$ üzərində smartfonlar arasında ilk pilllədə Xiaomi 12S Pro modeli AnTuTu üzrə 1024713 xallıq performans göstərərək, qiymət-performansı nəzərən 254.4 dəyərində qiymətləndirilir. İkinci və üçüncü pillələrdə isə ASUS ROG Phone 6 və OPPO Find X5 Pro modelləri yerləşir. Həmin modellərin də AnTuTu performansını, (mörtərizə daxilində) qiymət-performans qiymətləndirilməsini şəkildən görə bilərsiniz. Dördüncü yerdən başlayaraq isə cihazların yalnız qiymət-performans qiymətləndirilməsi göstərilir. 206.2 xalla Nubia Red Magic 7S Pro dördüncü, iQOO 10 Pro siyahıda beşinci olub.
AnTuTu reytinqinin oktyabr ayı üzrə 410-549$ aralığındakı liderləri isə üstdəki şəkillərdə göstərilən Nubia Z40S Pro, Motorola X30 Pro, Lenovo Legion Y90 modelləridir. Bu cihazlar arasında Nubia Z40S Pro xüsusilə Snapdragon 8+ Gen 1 çipseti ilə diqqət çəkir. Çindəki qiyməti sadəcə 440 dollardır.
275-410$ aralığındakı modellərə isə Motorola Edge X30, Redmi K50 Extreme Edition (POCO F4 GT), Lenovo Legion Y70 başçılıq edir. Motorola Edge X30 modeli Çində 316 dollar qarşılığında satılan Snapdragon 8 Gen 1 çipsetinə malik gözəl modellərdən biridir.
AnTuTu üzrə siyahının son pilləsində isə 275$-a qədər olan modellər yerləşdirilib. Bu siyahıda qlobal bazardan POCO X4 GT olaraq tanıdığınız Redmi Note 11T Pro liderdir. İkinci pillədə Realme GT Neo 2T, üçüncü pillədə OnePlus Ace Racing Edition qərarlaşır. POCO X4 GT həm qlobal bazarda, həm ölkəmizdə müəyyən qədər baha olsa da Çində sadəcə 200 dollara təklif edilir. Yəni sadəcə 345 manat ödəməklə həmin modelin Çindəki qarşılığı olan Redmi Note 11T Pro modelini almaq mümkündür.
Siyahıda ənənəvi olaraq Samsung modelləri yer almadığından Galaxy A və ya Galaxy S seriyasını görə bilmirik. Lakin Samsung rəqabətcil model təklif etmədiyindən heç bir qiymət səviyyəsi üzrə ən azından Çində reytinqə daxil ola biləcək səviyyədə deyil. Exynos 1280 ilə orta seqment Galaxy A seriyasının qiymət-performans reytinqi də xeyli aşağıdır. Siyahı isə Android cihazları əhatə edir.
