29 Noyabr – 1 Dekabr tarixlərində Bakıda növbəti oyun hakatonu – “gameponsjam vol.2” baş tutacaq.
Hakaton müddətində komandalar verilmiş mövzu əsasında 48 saat ərzində yeni oyun konseptləri üzərində işləyərək, öz prototiplərini hazırlayacaqlar. Ərsəyə gətirilən oyun layihələri peşəkar münsiflər heyətinə təqdim ediləcək və qalib komandalara müxtəlif kateqoriyalarda qiymətli mükafatlar təqdim olunacaq. Əlavə olaraq, hakaton zamanı oyun tərtibatı sahəsində müxtəlif mövzular üzrə seminarların da keçirilməsi nəzərdə tutulub.
“Gamepons” şirkəti Azərbaycan oyun ekosistemini qlobal oyun dünyası ilə birləşdirməyi hədəfləyən ölkənin ən böyük oyun ekosistemi şirkətidir. Cənubi Qafqaz və Mərkəzi Asiyanın ilk oyun əsaslı inkubasiya mərkəzi kimi fəaliyyət göstərən “Gamepons” şirkəti Azərbaycan Respublikası Mədəniyyət Nazirliyi və İnnovasiya və Rəqəmsal İnkişaf Agentliyi ilə birgə əməkdaşlıq çərçivəsində oyun sənayesinin inkişafı üçün mühüm addımlar atır. Şirkət fəaliyyətə başladığı dövrdən etibarən çoxsaylı oyun hakatonu təşkil edib.
Gamepons mütəmadi olaraq oyun tərtibatı üzrə vörkşoplar, tədbirlər və masterklaslar, həmçinin ölkəmizdə oyun tərtibatı sahəsinə gənc mütəxəssislər yetişdirmək məqsədilə tam təqaüdlü təlim proqramları həyata keçirir.
