Çinin Qobi və Təklaməkan səhralarının genişlənməsinin qarşısını almaq məqsədilə təxminən yarım əsrdir həyata keçirdiyi “Böyük Yaşıl Divar” layihəsi gözlənilməz elmi nəticələr ortaya qoyub. Yeni yayımlanan tədqiqat göstərib ki, layihə çərçivəsində 1978-ci ildən bəri əkilən 66 milyard ağac təbii meşələrlə müqayisədə xeyli daha sürətlə böyüyür. 2050-ci ilə qədər ümumi ağac sayının 100 milyarda çatdırılması planlaşdırılan bu nəhəng layihə qlobal iqlim modelləri üçün də yeni suallar yaradıb.
Tədqiqatçılar meşələrin inkişaf sürətini ölçmək üçün ağacların təpəsindəki yarpaq sıxlığını göstərən Yarpaq Sahəsi İndeksindən istifadə ediblər. Analizlər nəticəsində məlum olub ki, süni şəkildə əkilmiş meşələrin yarpaq sahəsi təbii meşələrə nisbətən 66% daha sürətlə artır. Bu fərqin əsas səbəbi əkilən meşələrin gənc olması ilə əlaqələndirilsə də, alimlər eyni yaş qrupunda və oxşar ekoloji şəraitdə olan ağacları müqayisə etdikdə belə, süni meşələrin 4,6% daha sürətlə böyüdüyünü qeydə alıblar.
Bu sürətli böyümənin arxasında bir neçə mühüm amil dayanır. İnsan əli ilə yaradılan meşələrdə adətən evkalipt və qovaq kimi sürətlə inkişaf edən ağac növlərinə üstünlük verilir. Bundan əlavə, bu ərazilərdə rəqabət yaradan zərərli bitkilər təmizlənir, gübrələmə aparılır və mütəmadi qulluq göstərilir. Bütün bu ideal şərait ağacların atmosferdəki artan karbon qazı (CO2) səviyyələrinə daha güclü reaksiyası verməsinə və sürətlə inkişaf etməsinə şərait yaradır.
