Bugatti brendi altında hazırlanan və adi mebel parçasından 137 düymlük nəhəng televizora çevrilən qeyri-adi cihaz sosial şəbəkələrdə yenidən gündəm olub. Bir düyməyə toxunmaqla avtomatik açılan televizorun bütün transformasiya prosesi cəmi 45 saniyə çəkir.
N1 adlanan televizor Avstriyanın lüks televiziya istehsalçısı C SEED ilə Bugatti-nin əməkdaşlığı nəticəsində hazırlanıb. Model 110 və 137 düymlük iki fərqli ölçüdə təklif olunur və 4K MicroLED ekranla təchiz edilib.
Televizor söndürüldükdə ekran tamamilə qatlanaraq xüsusi korpusun daxilində gizlənir. Bugatti bu konstruksiyanı hiperkarlarının dizaynından ilhamlanan “memarlıq bufeti” kimi xarakterizə edir. Beləliklə, istifadə edilmədiyi vaxt otaqda nəhəng qara ekran əvəzinə lüks mebel elementini xatırladan konstruksiya qalır.
Bir düyməyə basıldıqda isə mexanizm işə düşür. Ekran korpusdan yüksəlir və bir neçə hissədən ibarət panellər mərhələli şəkildə açılaraq 137 düymlük vahid ekrana çevrilir. Bütün proses başlanğıcdan sona qədər təxminən 45 saniyə davam edir.
Açıldıqdan sonra televizor 180 dərəcə döndərilə bilir. Səs sistemi də oxşar mexanizmdən istifadə edir: televizor açıldıqda dinamiklər avtomatik olaraq korpusdan çıxır, söndürüldükdə isə yenidən gizlənir.
N1-in 4K MicroLED ekranı HDR10+ texnologiyasını dəstəkləyir. İstehsalçı qatlanan ayrı-ayrı ekran modulları arasındakı birləşmə xətlərinin görüntüyə mümkün qədər az təsir etməsi üçün xüsusi texnologiyadan istifadə edib.
C SEED-in baş direktoru Alexander Swatek bildirib ki, şirkətin məqsədi artıq adi televizor kateqoriyasına aid edilə bilməyəcək bir məhsul yaratmaq olub. Onun sözlərinə görə, yanaşma Bugatti-nin sadəcə avtomobil deyil, xüsusi mühəndislik və dizayn məhsulu yaratmaq fəlsəfəsinə bənzəyir.
N1-in ən maraqlı detallarından biri isə qiymətinin açıq şəkildə göstərilməməsidir. Nə Bugatti, nə də C SEED televizorun satış qiymətini rəsmi saytında açıqlayır. Məhsulla maraqlanan alıcılar seçilmiş tərəfdaşlara və rəsmi satış nümayəndələrinə müraciət etməlidirlər.
C SEED 2–4 sentyabr tarixlərində Denverdə keçiriləcək CEDIA Expo sərgisində N1-i nümayiş etdirməyi planlaşdırır. Ziyarətçilər burada 137 düymlük televizorun 45 saniyəlik transformasiyasını canlı görə biləcəklər.
