Çin avtomobil istehsalçılarının qlobal bazarda sürətlə güclənməsi Yaponiyanın avtomobil sənayesində ciddi narahatlıq yaradıb. Toyota şirkətinin vitse-prezidenti Kodzi Sato bildirib ki, Yaponiya istehsalçıları xərcləri azaltmaq və rəqabət qabiliyyətini qorumaq üçün daha sıx əməkdaşlıq etməlidirlər.
Onun sözlərinə görə, “əgər heç nə dəyişməsə, bu vəziyyətdə ayaqda qalmaq mümkün olmayacaq”.
Çin markaları Avropada ilk dəfə Yaponiyanı qabaqlayıb
Kodzi Satonun açıqlaması Çin istehsalçılarının Avropa bazarında mühüm uğur qazandığı dövrə təsadüf edir.
Son statistikaya əsasən, Geely, SAIC, BYD, Chery və Leapmotor may ayında Avropada birlikdə 138 mindən çox avtomobil satıb.
Eyni dövrdə Toyota, Suzuki, Honda, Nissan, Mazda və Mitsubishi markalarının ümumi satışları təxminən 130 min ədəd təşkil edib.
Beləliklə, Çin avtomobil istehsalçıları ilk dəfə Avropa bazarında Yapon markalarını geridə qoyublar.
Çin bazarında da mövqelər zəifləyir
Yapon istehsalçıları özlərinin ən böyük bazarlarından biri olan Çində də bazar payını itirməyə başlayıblar.
Elektrikli avtomobillər, ultra sürətli enerji doldurma texnologiyaları və proqram təminatı baxımından üstünlük qazanan Çin markaları sürətlə böyüyür.
İlin ilk yarısında Toyota-nın Çində satışları 17%, Honda-nın satışları isə 35% azalıb.
Oxşar tendensiya Cənub-Şərqi Asiya və Avstraliya bazarlarında da müşahidə olunur.
Ortaq standartlar təklif olunur
Toyota rəhbərliyi istehsal xərclərini azaltmaq üçün bütün Yapon avtomobil istehsalçıları arasında bəzi hissələrin standartlaşdırılmasını təklif edir.
Söhbət əsasən alıcıların birbaşa fərq etmədiyi komponentlərdən gedir:
- polad materiallar;
- elektrik naqil sistemləri;
- plastik hissələr.
Şirkət hesab edir ki, bu yanaşma istehsal xərclərini azaldacaq və qənaət edilən vəsaiti proqram təminatı, sürücüyə yardım sistemləri, yeni nəsil batareyalar və sürətli enerji doldurma texnologiyalarının inkişafına yönəltmək mümkün olacaq.
Həyata keçirilməsi asan olmayacaq
Bununla belə, müxtəlif istehsalçıların fərqli platformaları və istehsal proseslərini vahid standart altında birləşdirmək texniki və təşkilati baxımdan mürəkkəb proses hesab olunur.
Bu səbəbdən belə əməkdaşlığın bütün Yapon avtomobil sənayesi üzrə reallaşıb-reallaşmayacağı hələlik məlum deyil. Bununla belə, Toyota hesab edir ki, Çin istehsalçılarının sürətlə artan rəqabəti fonunda Yapon şirkətləri əvvəlkindən daha sıx əməkdaşlıq etməyə məcbur olacaqlar.
