Avropada son həftələrdə təsirini artıran və “Əjdaha istiləri” adlandırılan qeyri-adi isti hava dalğası qitədə kondisioner ehtiyatlarının sürətlə tükənməsinə səbəb olub. Mövcud anbarların boşalması fonunda çıxış yolunu Türkiyə bazarında görən Avropa ölkələri, xüsusən də Fransa və Almaniya, türk istehsalçılardan təcili məhsul tədarükü tələb edir.
Vəziyyətin ciddiliyini vurğulayan “Midea Türkiyə”nin baş direktoru Aydın Kuzaltı, Avropadan “Əlinizdə nə qədər anbar ehtiyatı varsa, bizə göndərin” şəklində təcili müraciətlər aldıqlarını bildirib. Hazırkı sifarişlərin hələlik on minlərlə ölçüldüyü, lakin qısa zamanda 100 min ədədlik həcmlərə çata biləcəyi proqnozlaşdırılır. Bu intensiv tələbat təkcə kondisionerlərlə məhdudlaşmır. Sərinkeşlər və digər havalandırma sistemləri də eyni dərəcədə axtarışdadır.
Sektor nümayəndələri Türkiyənin bu kritik dövrdə Avropa üçün əsas strateji tədarük mərkəzinə çevrildiyini diqqətə çatdırırlar. “Daikin Türkiyə”nin baş direktor müavini Olcay Avcının sözlərinə görə, şirkətin Hendekdəki zavodu qrupun Avropadakı yeganə fancoil istehsal mərkəzidir və burada istehsal olunan yüksək texnologiyalı sistemlərin təqribən 60%-i qitəyə ixrac edilir. Türkiyənin coğrafi mövqeyi, çevik istehsal gücü və sürətli çatdırılma imkanları onu Avropa üçün əvəzolunmaz tərəfdaş edir.
Aşırı istilər yalnız yeni cihaz satışlarını deyil, quraşdırma və texniki xidmət tələblərini də tarixi rekord səviyyələrə çatdırıb. Kondisioner istifadəsinin ənənəvi olaraq az olduğu İngiltərədə iyun ayında quraşdırma tələbləri 340%, İspaniyada isə 373% artıb. Analoji vəziyyət Türkiyənin daxili bazarında da müşahidə olunur. Ölkə daxilində yeni quraşdırma müraciətləri 140%, kondisioner qazının doldurulması xidməti isə 243% yüksəlib.
İqlimləşdirmə Sənayesi İxracatçıları Birliyinin (İSİB) rəhbəri Osman Baştaşın fikrincə, Avropada baş verən bu proseslər sadəcə qısamüddətli “yay təsiri” deyil. Artıq kondisionerlər lüks olmaqdan çıxaraq həm gündəlik həyat, həm də sənaye üçün zəruri ehtiyaca çevrilib. Mövcud istilik artımı ilə ayaqlaşa bilməyən köhnə sistemlərin yenilənməsi ehtiyacı, bazarı daha ekoloji təmiz, yüksək səmərəli “inverter” kondisionerlərə və ağıllı bina həllərinə doğru istiqamətləndirir.
