Çinli avtomobil istehsalçılarının qlobal bazarda sürətli və aqressiv yüksəlişi Yaponiyanın ənənəvi avtomobil sənayesini yeni və radikal həll yolları axtarmağa məcbur edib. “Toyota” şirkətinin vitse-prezidenti Koci Sato istehsal xərclərini azaltmaq və rəqabət qabiliyyətini artırmaq məqsədilə Yapon istehsalçıları arasında bəzi avtomobil ehtiyat hissələrinin standartlaşdırılmasını təklif edib. Təchizatçıların illik toplantısında çıxış edən Sato vəziyyətin ciddiliyini “Bir şeylər dəyişməsə, həyatda qala bilməyəcəyik” sözləri ilə ifadə edib.
Yapon markalarının narahatlığı əsaslıdır. Avropa Avtomobil İstehsalçıları Birliyinin məlumatlarına görə, Çin markaları may ayında Avropada 138 mindən çox avtomobil sataraq, ilk dəfə olaraq Yapon nəhənglərini geridə qoyub. Eyni zamanda, elektromobil transformasiyasına gecikən Yapon markaları Çin daxili bazarında da ciddi qan itirir. Məsələn, ilin ilk yarısında “Toyota”nın Çindəki satışları 17%, “Honda”nın isə 35% azalıb.
Bu tendensiyanı qırmaq üçün Koci Sato Yapon Avtomobil İstehsalçıları Birliyi çərçivəsində “Yapon standartı”nın yaradılmasını irəli sürüb. Bu təklif, müştərilərin birbaşa fərq etmədiyi polad detallar, naqil sistemləri və plastik qapaqlar kimi hissələrin bütün Yapon markalarında ortaq standartlara gətirilməsini nəzərdə tutur. Sato qeyd edib ki, hazırda yalnız naqil sistemlərində 70 minə yaxın fərqli variasiya mövcuddur. Bu müxtəlifliyin azaldılması istehsal xərclərində böyük qənaətə səbəb ola bilər.
Əldə edilən qənaət sayəsində şirkətlər öz resurslarını müasir alıcılar üçün daha vacib olan proqram təminatı, sürücüyə dəstək sistemləri və ultra-sürətli şarj texnologiyalarına yönəldə biləcəklər. Lakin ekspertlər bildirirlər ki, bütün sənaye boyu ortaq ehtiyat hissələrinə keçid heç də asan məsələ deyil. Fərqli markaların, modellərin və istehsal infrastrukturunun vahid standartlar altında birləşdirilməsi həm texniki, həm də əməliyyat baxımından nəhəng koordinasiya tələb edir. Bu baxımdan təklifin nə dərəcədə tətbiq oluna biləcəyi hələlik qeyri-müəyyənliyini qoruyur.
