Redmi K60 seriyasının növbəti ilin ilk rübündə bazara çıxarılacağı gözlənilir. Lakin indidən K60 seriyasının mühüm detalları ilə bağlı söz-söhbətlər ortaya çıxmağa başlayıb. Məşhur Çinli insayder Digital Chat Station qarşıdan gələn K60 modelinin ekranı, çipseti, batareyası və şarj detalları haqqında vacib məlumatları bölüşüb. Beləliklə, Xiaomi şirkətinin daha ucuz modellərində 30 vatt naqilsiz şarj və 5500 mAs batareya istifadəsinə başlayacağına dair yeni detallar üzə çıxıb.
Analitikin sözlərinə görə, Redmi K60 modeli 2K təsvir ölçülü ekrana malikdir. Çində mövcud olan bütün K50 seriyalı telefonlar AMOLED panelə malik olduğundan, yeni seriya modeli də AMOLED ekrana sahib olacaq. Hələlik ekran ölçüsü və yeniləmə sürəti haqqında heç nə qeyd edilməyib. Lakin standart olaraq 120Hz tezlikli 6.67 düymlük ekran panelinin mövcud olacağı gözlənilir.
Snapdragon 8+ Gen 1 çipsetindən öz gücünü alacaq smartfon 5500 mAs batareya ilə gələcək. Cihaz 67 Vt simli doldurma və ilk dəfə 30 Vt simsiz enerji doldurma dəstəyi gətirəcək. Simsiz doldurma texnologiyası və 5500 mAs batareya nisbətən ucuz olan bu seriya daxilində bir ilk olmalıdır. Sızıntılarda qeyd edilməsə də çox güman ki, Android 13 əməliyyat sistemi üzərinə MIUI 14 əvvəlcədən quraşdırılmış olaraq gələcək.
K60 Pro isə iddialara görə daha tez, bu ilin noyabrında satışa çıxarılacaq. Cihazın Snapdragon 8 Gen 2 ilə təchiz ediləcəyi bildirilir. Buna görə də, yuxarıda qeyd olunan xüsusiyyətlərin standart K60 modelinə aid olduğu demək olar dəqiqdir. Redmi K60 seriyasında neçə cihazın daxil olacağı hələlik bəlli deyil.
Xatırladaq ki, Redmi K60 modelinin qlobal bazarlarda POCO F5 kimi rebrendinq ediləcəyini də sizlərlə bölüşmüşdük. Düşüncələrinizi şərh qismində bizlərlə bölüşə bilərsiniz!
