Xiaomi şirkətinin POCO törəmə breni 2 vacib seriya modelini artıq hazırlıq mərhələsinə daxil edib. Belə ki, yeni POCO X5 və POCO F5 seriyası barədə ilkin məlumatlar xiaomiui resursu tərəfindən paylaşılıb. İlk növbədə büdcəvi model olması ilə fərqlənən POCO X5 seriyasına nəzər salaq. İndiyə qədər POCO X seriyası daxilində heç bir cihazın POCO X3 Pro qədər uğurlu olmadığı kimi, POCO X5 5G də gözləntilərimizin biraz gerisində qalır. Verilən məlumata görə “redwood” kod adına sahib POCO X5 5G modeli öz gücünü Snapdragon 778G+ çipsetindən alacaq. Çipsetin Snapdragon 778G+ olduğunu gördükdə ən azından daha keyfiyyətli AMOLED ekran paneli işlədilər deyə düşünsəniz, yenə yanılacaqsınız. Çünki, smartfona 120Hz tezlikli IPS LCD ekran paneli quraşdırıldığı bildirilib.
Kamera və digər xüsusiyyətləri tam məlum olmasa da əsas rəqibi olan POCO X4 GT modelindən nisbətən ucuz qiymət etiketi ilə təklif ediləcəyi dəqiqdir. Həmçinin qeyd edək ki, Çində yaxın vaxtlarda debüt edəcək Redmi Note 12 seriyası daxilində hansısa modelin təkrar brendləşdirilmiş versiyası olacaq. Model nömrəsi istinadən dekabr-yanvar ayları aralığında satışa çıxarıla biləcəyini söyləyə bilərik. “22101320G” model nömrəsi “22-10” olmaqla bu ilin oktyabr ayını vurğulayır. Smartfonlar isə adətən, model nömrəsində göstərilən tarixdən 2-3 ay sonra satışa çıxarılır.
İndi isə POCO F5 modeli barədə biraz bəhs edək. “Mondrian” kod adına sahib smartfonun Snapdragon 8+ Gen 1 çipseti ilə təchiz edildiyi bildirilir. Çində təqdim ediləcək Redmi K60 modeli ilə uyğun model nömrəsinə malik smartfon, elə həmin modelin təkrar brendləşdirilmiş versiyası olacaq. POCO F4 və POCO F3 modellərindəki Snapdragon 870 ilə müqayisədə Snapdragon 8+ Gen 1 çipsetinə yüksəltmə ciddi performans artımı gətirəcək. Digər bir tərəfdən POCO F5 modeli brendin ilk 2K ekran panelinə sahib smartfonu olacaq. Smartfona quraşdırılacaq 120Hz tezlikli ekran paneli 1440x3200p təsvir ölçüsünə və 1000 nit maksumum parlaqlığa çatacaq. Lakin bu smartfon üçün hələ ki, minimum 4-5 ay gözləməli olacaqsınız. “23013PC75G” model nömrəsi “23-01” olmaqla növbəti ilin yanvar ayına işarə edir. Bu hesabla təqribi mart-aprel aylarından etibarən smartfon əlçatan ola bilər.
