Elektrikli avtomobil sənayesinə ilk addımını SU7 modeli ilə atan Xiaomi brendi bu dəfə avtomobil çeşidini artırır. Belə ki, texnologiya nəhəngi indi yeni avtomobilini buraxmağa hazırlaşır. Söhbət isə 2025-ci ilin yayında təqdim olunacaq yeni Xiaomi YU7 adlı elektrikli SUV modelindən gedir.
Avtomobilin yaxından çəkilmiş yeni görüntüləri internetdə böyük marağa səbəb olub. Belə ki, sızdırılan görüntülər Xiaomi YU7-nin dizaynını daha yaxından nəzərdən keçirməyə imkan verir. Şirkət SU7-nin tanış dizayn elementlərini yolsuzluq avtomobilinə köçürməyi seçib. Xüsusilə faralar və ön hissədə sedan modelinin izləri var. YU7-nin SU7-dən ilham alması, Xiaomi-nin avtomobil dizaynında bütövlük yaratmağa çalışdığını göstərir. Belə ki, daha əvvəl avtomobilin 4999 mm uzunluğunda olduğu və maksimal sürəti 253 km/saata çata biləcəyi açıqlanmışdı.
Həmçinin, yeni YU7 elektrikli SUV-nin tək mühərrikli və iki mühərrikli versiyaların olacağı barədə də məlumat mövcuddur. YU7-nin xüsusilə SUV seqmentində rəqabət yaradacağı gözlənilir. Əgər onun qiyməti də rəqabətədavamlı olarsa Xiaomi bu sahədə bazar payını artıra bilər. Alınan ilkin məlumata görə, qiymət təxminən 34.200 dollar olacaq. Bununla belə, dəqiq rəqəmi öyrənmək üçün hələ iyun və ya iyul aylarını gözləməliyik. O cümlədən avtomobilin texniki xüsusiyyətləri barədə məlumat verilməyib.
