Günəş enerjisi ilə işləyən avtomobillərdə qabaqcıl şirkətlərdən biri olan Aptera Motors, istehsal mərhələsinə ən yaxın olan modelinin ilk uzun məsafəli sınaqlarını uğurla başa vurub. Aptera tərəfindən paylaşılan bir yeniləməyə görə, şirkətin yeni nəsil günəş elektromobili(SEV) tamamilə elektrik batareyası və günəş panellərindən pulsuz enerji ilə 300 mildən (təxminən 480 km) çox yol qət edib.
Qeyd edək ki, Aptera’nın səyahəti Arizona ştatının Flagstaff yüksək hündürlük ərazisində başlayıb. Komanda, panellərin avtomobili yola göndərməzdən əvvəl 300 vatt enerji topladığını bildirib. Marşrutun böyük hissəsi məşhur Route 66 şossesi boyunca keçsə də, komanda avtomobilin işinə nəzarət etmək üçün Bearizona heyvanlar qoruğu və Havasu gölü kimi əlamətdar yerlərdə dayanıb. Səfərdə diqqət çəkən məqamlardan biri də avtomobilin günəş panellərinin buludlu havaya baxmayaraq 545 vatt enerji istehsal edə bilməsi idi. Beləliklə, Aptera-nın tam elektrik güc aqreqatı və günəş enerjisindən əldə edilən əlavə diapazonu avtomobilə bir şarjla 480 km-dən çox məsafə qət etməyə imkan verir.
Ümumiyyətlə, bu sınaq, ptera avtomobilin səmərəliliyi və aerodinamik performansı ilə bağlı əvvəlki sınaqları keçirdikdən sonra həyata keçirilib. Mojave səhrasında aparılan əvvəlki sınaqlarda avtomobilin aerodinamik itkiləri və enerji ötürmə səmərəliliyi ətraflı şəkildə ölçülüb. Bununla belə, bu yeni səyahət avtomobilin real yol şəraitində necə performans göstərdiyini qiymətləndirmək üçün böyük əhəmiyyət kəsb edirdi. Aptera, bu uğurlu sınaq sürücüsünü qeyd etmək üçün 800 dollarlıq “günəş hədiyyə paketi” veriləcəyini açıqlayıb. Avtomobilin hər gün istehsal prosesinə yaxınlaşdığı və bu testin SEV-i ticari olaraq satışa çıxarmağa bir addım daha yaxınlaşdırdığı bildirilib.
