Tecno brendini hər zaman büdcə üçün uyğun qiymətə, rəqabətcil xüsusiyyətlər təklif edən smartfonları ilə tanıyırıq. Elə hər il olduğu kimi, bu il də Tecno brendi 2025-ci ilə yeni nəsil Spark 30 seriyasını Azərbaycan bazarına gətirməklə yeni bir rəqabətə başlayır. Bu il Tecno Spark 30 seriyası Azərbaycanda Tecno Spark 30 Pro, Tecno Spark 30c və Tecno Spark 30 sadə modelləri ilə təmsil olunur.
Gəlin, ilk növbədə seriyanın bu məqaləmizdə ələ alacağımız ən güclü modeli olan Tecno Spark 30 Pro modeli haqqında bəhs edək. Qutudan başlasaq, parlaq narıncı qapaqlı qalın qutunun içərisində standart TECNO dəsti alıcılarına təklif olunur.
Smartfon indi dəbdə olan düz kənarlı çərçivələrə malikdir. Gövdənin əlinizdə rahat hiss yaratması üçün kənar uclar biraz yuvarlaq stildə, yeni nəsil flaqman smartfonları xatırladır. Mat arxa qapaq üzərindən parlaq xətt keçir, xəttin altına isə xüsusi işləmələr əlavə olunub.
Çəkisi yüngüldür, həm də seriyanın ən naziki modeli kimi 7,4 mm-dir. Aşağıda USB-C və 3,5 mm qulaqlıq girişləri mövcuddur. Optik barmaq izi skaneri ekranın altına yerləşdirilib. Tez reaksiya verir və hətta standart qoruyucu filmlə də bloklanmır. Cihaz IP54 standartına uyğun olaraq toz və sıçramalardan da qorunur. Bu o deməkdir ki, yağış damcıları və ya su sıçraması cihazınıza zərər verməyəcək.
Tecno Spark 30 Pro parlaqlıq baxımından olduqca yaxşı, 1700 nit pik parlaqlığa çatan 6,8 düymlük AMOLED ekran paneli alıb. Bu ölçü onu əksər flaqman cihazlardan belə böyük ölçülü alternativ seçimlərdən birinə çevirir. Ekran 10 bit rəng dərinliyi ilə DCI-P3 rəng məkanının 100%-ni əhatə edir. Praktikada istər videoya baxsaq, istərsə də sosial şəbəkələrdə, hətta oyunlarda 1500 Hz-lik toxunma ayırdetmə sürəti ilə ekranın həssaslığını yüksək qiymətləndirəcəklər. PWM tezliyi də kifayət qədər yüksəkdir. 2160 Hz PWM teziyi ilə həssas istifadəçilərin də gözləri yorulmayacaq.
Spark 30 Pro, bu qiymət seqmentindəki cihazlar üçün məşhur seçim olan 6nm Helio G100 çipsetindən istifadə edir. Oyun rejimi ilə güc əlavə etmək mümkündür. Bunun sayəsində yüksək performans seçimini aktivləşdirə bilərsiniz. Sürətli performans üçün Helio G100 kifayət edəcək. 256GB ilə smartfonunuzun yaddaşının tükənməsindən narahat olmadan proqramlar arasında asanlıqla keçid edə bilərsiniz.
Arxada dörd obyektiv görünür, lakin yalnız 2 ədəd kameramız mövcuddur. Onlardan ən funksional olanı isə 108 MP əsas moduldur. İşıq səviyyəsini təyin etmək və portret rejimini düzgün idarə etmək üçün köməkçi sensorumuz da vardır. Çəkiliş zamanı ×1 və ×3 böyütmə seçimləri arasında keçid edə bilərsiniz. Rəqəmsal yaxınlaşdırma olsa belə, sensorun çox yüksək təsvir ölçüsünə görə, kəsilmiş fotoşəkil vizual olaraq adi fotoşəkildən çox da fərqlənmir. Əsas modul həm daxili, həm də açıq havada fotoqrafiyanın öhdəsindən yaxşı gəlir. Rənglər parlaq və dinamikdir, təsvir həddindən artıq təhrif olunmur. Öndə isə 13 MP selfi kameramız var. İlk baxışda görünür ki, çəkiliş biraz bulanıqdır. Lakin görüntü işləndikdən sonra selfi kamerası nəticələrinin süni intellekt imkanları ilə əhəmiyyətli dərəcədə artırıldığını görə bilirsiniz. Smartfon HiOS 14.5 versiyası ilə Android 14 əməliyyat sistemi ilə işləyir. Bu proqram təminatı oyunlarda və digər proqramlarda performansı yaxşılaşdırmaq üçün virtual RAM artımı xüsusiyyəti, “Smart Panel” ilə süni intellekt əsaslı tətbiq tövsiyələri, “AI Eraser” ile şəkillərdən istənilməyən hissələrin silinməsi imkanı və.s bu cihazda mövcuddur.
Smartfon 2024-cü il üçün standart olan 5000 mAh batareyaya malikdir. Saatlarla oynamasanız, şarj asanlıqla səhərdən axşama qədər davam edəcək. Cihaz 33W sürətli şarj dəstəkləyir.
Tecno Spark 30c və Tecno Spark 30 nə vəd edir?
Tecno Spark 30c modeli də büdcə dostu alternativlərdən biridir. O, 6,6 düymlük IPS LCD ekranla təchiz edilib və 90 Hz yeniləmə tezliyinə malikdir. Cihaz Unisoc T606 prosessoru ilə gəlir və gündəlik istifadə üçün kifayət qədər stabil performans təqdim edir. 128GB daxili yaddaş və 8GB-a qədər RAM seçimi bu cihazı əlverişli edir. Arxa kamera sistemi 50 MP əsas sensor və köməkçi sensor ilə təchiz olunub. Ön kamera 8 MP-dir. Batareya gücü 5000 mAh olub, 18W sürətli şarj dəstəkləyir. Tecno Spark 30 isə daha sadə variantdır. O, 6,6 düymlük HD+ IPS LCD ekran ilə gəlir. Mediatek Helio G85 prosessoru ilə təchiz olunub və gündəlik istifadədə kifayət qədər sürətli performans təmin edir. 64GB və ya 128GB yaddaş variantları ilə seçim imkanı verir. Arxa tərəfində 50 MP əsas kamera və köməkçi sensor yerləşdirilib. Ön kamerası isə 8 MP-dir. 5000 mAh batareyaya sahib olan bu model, 18W sürətli şarj dəstəyi ilə gəlir. Bu modellər arasında seçim edərkən ehtiyaclarınıza uyğun olanı seçə bilərsiniz. Əgər daha güclü ekran, kamera və performans istəyirsinizsə, Tecno Spark 30 Pro modeli ideal seçim ola bilər. Daha sərfəli, lakin funksional bir cihaz axtarırsınızsa, Tecno Spark 30c və Tecno Spark 30 modelləri sizi qane edəcək.
