Apple-ın yüksək yaddaş tutumlu iPhone 18 Pro Max modelində istifadə etdiyi QLC NAND yaddaşın intensiv məlumat yazılması zamanı performans itkisinə səbəb olduğu bildirilir. Aparılan sınaqlarda 1 TB-lıq modeldə yazma sürətinin bəzi ekstremal hallarda 1,1 MB/s-yə qədər azaldığı qeydə alınıb.
Çinin HOMOLAB texnologiya kanalının testində 1 TB iPhone 18 Pro Max ilə 512 GB iPhone 18 Pro müqayisə edilib. Məlumata görə, iPhone 18 Pro Max-da QLC NAND, 512 GB iPhone 18 Pro-da isə TLC NAND yaddaşdan istifadə olunur. QLC texnologiyası bir yaddaş hüceyrəsində daha çox məlumat saxlamağa imkan versə də, uzunmüddətli intensiv yazma əməliyyatlarında TLC ilə müqayisədə daha aşağı performans göstərə bilir.
Qarışıq iş yükü testində iPhone 18 Pro Max 8 168, iPhone 18 Pro isə 11 285 bal toplayıb. Beləliklə, QLC yaddaşlı modelin nəticəsi təxminən 38 faiz aşağı olub. Daha ağır iş yükündə fərq azalsa da, TLC yaddaşlı model təxminən 12 faiz üstünlüyünü qoruyub.
Testə əsasən, iPhone 18 Pro Max ilkin mərhələdə 3 000 MB/s-yə çatan SLC keş yaddaşından istifadə edir. Bu yaddaş dolduqdan sonra sürəti təxminən 578 MB/s olan ikinci bufer işə düşür. Hər iki buferin imkanları tükəndikdə məlumat birbaşa QLC NAND-a yazılır və orta sürət 79,4 MB/s-yə qədər azalır. Sınaq zamanı 25,6 MB/s-lik göstəricilər də qeydə alınıb.
Yaddaş dolduqca performans daha çox aşağı düşə bilir. Telefonun yaddaşının 60 faizi istifadə edildikdə SLC keşinin mövcud tutumunun 250 GB-dan 58 GB-a endiyi bildirilir. Bu vəziyyətdə ikinci buferin orta sürəti 396 MB/s, birbaşa QLC yaddaşa yazma sürəti isə təxminən 45 MB/s olub. HOMOLAB-ın daha intensiv sınaqlarında sürətin qısa müddət ərzində 1,1 MB/s-yə qədər düşdüyü də qeydə alınıb.
Bununla belə, nəticələr əsasən yaddaş sistemini uzun müddət maksimum yükləyən sınaqlara aiddir. İnternetdən istifadə, mesajlaşma, oyun və adi foto çəkilişi kimi gündəlik əməliyyatlarda əksər istifadəçilərin ciddi fərq hiss etməyəcəyi bildirilir.
Performans fərqi xüsusilə uzunmüddətli 4K və ProRes video çəkilişi, böyük həcmli faylların köçürülməsi və ehtiyat nüsxələrin yazılması kimi intensiv əməliyyatlarda özünü göstərə bilər. Bu səbəbdən yüksək yaddaş tutumlu iPhone-dan peşəkar kontent istehsalı üçün istifadə edənlər üçün nəticələr daha çox əhəmiyyət daşıyır.
