Mercedes-Benz şəhər daxilində nöqtədən-nöqtəyə hərəkət edə bilən yeni sürüş dəstək sistemi üçün Böyük Britaniyanın Wayve şirkəti ilə əməkdaşlığa başlayıb. Wayve-in süni intellekt əsaslı “AI Driver” texnologiyasının növbəti iki il ərzində Mercedes-Benz avtomobillərində istifadəyə verilməsi planlaşdırılır.
Şirkətlərin açıqlamasına görə, yeni sistem Mercedes avtomobillərində şəhər daxilində nöqtədən-nöqtəyə təkmilləşdirilmiş sürüş dəstəyi təqdim edəcək. Sistem sürücünün nəzarəti altında şəhər trafikində hərəkət, dönmə və müxtəlif yol vəziyyətlərinə reaksiya kimi sürüş tapşırıqlarının əhəmiyyətli hissəsini öz üzərinə götürə biləcək. Bu baxımdan texnologiya funksional olaraq Tesla-nın FSD sisteminə bənzər yanaşma təklif edir.
Mercedes-Benz və Wayve texnologiyanın ilk olaraq hansı modellərdə və hansı ölkələrdə istifadəyə veriləcəyini hələ açıqlamayıb. Sistemin texniki imkanları və hansı şəraitdə işləyəcəyi barədə də ətraflı məlumat verilməyib.
Mercedes eyni zamanda Nvidia ilə də sürüş dəstək texnologiyaları üzərində işləyir. Şirkət daha əvvəl Nvidia texnologiyalarına əsaslanan MB.Drive Assist Pro sistemini təqdim edib. Bu sistem sürücünün nəzarəti altında avtomobili müəyyən edilmiş ünvana qədər idarə etməyə, piyadalara, işıqforlara və mürəkkəb yol şəraitinə uyğun reaksiya verməyə kömək edir.
Mercedes-Benz-in sürüş dəstək sistemləri sahəsində təcrübəsi uzun illərə dayanır. Şirkət 1990-cı illərin sonunda S-Class modelində radar əsaslı Distronic adaptiv kruiz-kontrol sistemini istifadəyə verən ilk istehsalçılardan biri olub.
2023-cü ildə isə Mercedes ABŞ-də Drive Pilot sistemini istifadəyə verib. Seviye 3 avtonom sürüş kateqoriyasına daxil olan sistem Kaliforniya və Nevada ştatlarında müəyyən avtomobil yollarında və məhdud şərtlər daxilində sürücünün əllərini sükandan, diqqətini isə müvəqqəti olaraq yoldan ayırmasına imkan verir.
Şirkət hazırda şəhər daxilində daha geniş istifadə imkanları təqdim edən nöqtədən-nöqtəyə sürüş texnologiyalarına diqqəti artırır. Wayve ilə yeni əməkdaşlığın nəticələrinin 2028-ci ildən etibarən Mercedes-Benz avtomobillərində görünməsi gözlənilir.
