Google Gemini platformasında modellərə giriş qaydalarını dəyişir. Yeni qaydalar 9 oktyabr 2026-cı ildən etibarən ödənişli süni intellekt abunəliyi olmayan istifadəçilərə tətbiq ediləcək.
Dəyişiklikdən sonra pulsuz Gemini istifadəçiləri Flash və Pro modellərinə giriş imkanını itirəcək. Bu istifadəçilərə yalnız daha yüngül Flash-Lite modeli təqdim ediləcək.
AI Plus abunəçiləri üçün də məhdudiyyət nəzərdə tutulur. Bu paketdən istifadə edənlər Pro modelinə giriş imkanını itirəcək, lakin Flash-Lite və Flash modellərindən istifadə etməyə davam edə biləcəklər. Dəyişikliklərin AI Plus istifadəçiləri üçün hansı tarixdən qüvvəyə minəcəyi onlara elektron poçt vasitəsilə bildiriləcək.
AI Pro abunəçiləri isə Flash-Lite, Flash və Pro modellərinin hər üçünə çıxış əldə edəcəklər. Bundan əlavə, əvvəllər yalnız AI Ultra paketində təqdim edilən Deep Think funksiyası AI Pro istifadəçiləri üçün də əlçatan olacaq.
AI Ultra abunəçiləri üçün mövcud model əlçatanlığında dəyişiklik nəzərdə tutulmur.
Google-un oktyabr ərzində Gemini tətbiqində modellərin istifadəsi üçün üç fərqli səviyyə də təqdim edəcəyi gözlənilir. Aşağı, orta və yüksək olaraq müəyyənləşdirilən bu səviyyələr modelin cavab hazırlamaq üçün istifadə etdiyi hesablama imkanlarını tənzimləyəcək. Daha sadə və sürətli sorğular üçün aşağı səviyyədən istifadə etmək mümkün olacaq, daha mürəkkəb tapşırıqlarda isə yüksək səviyyə daha çox istifadə limitinin sərf olunmasına səbəb olacaq.
Beləliklə, Gemini-də daha güclü modellərə çıxış getdikcə ödənişli abunə paketləri ilə əlaqələndiriləcək. Xüsusilə pulsuz istifadəçilər üçün Flash və Pro modellərinin bağlanması 9 oktyabrdan etibarən platformanın imkanlarını nəzərəçarpacaq dərəcədə məhdudlaşdıracaq.
Mənbədə həmçinin yaxın zamanda təqdim edilən Gemini 4 Argon modelinin hansı abunə paketlərində əlçatan olacağı ilə bağlı hələ yeni məlumatın olmadığı bildirilir.
