Fransanın avtomobil istehsalçısı Renault məşhur Megane modelinin yeni nəslini hazırlayır. Tamamilə yenilənmiş dizayn, elektrik mühərriki və qabaqcıl texnologiyalarla təchiz ediləcəyi gözlənilən avtomobilin Tesla Model Y də daxil olmaqla, orta sinif elektrik avtomobilləri ilə rəqabət aparacağı bildirilir. Yeni modelin 2028-ci ildə bazara çıxarılması planlaşdırılır.
AutoExpress nəşrinin yayımladığı qeyri-rəsmi rəqəmsal təsvirlərə əsasən, yeni Megane hündür kuzovlu hetçbek formasında ola bilər. Avtomobilin ön hissəsində yeni Renault Clio modelindən götürülmüş dizayn elementlərinin, nazik LED faraların və kiçik hava girişlərinin istifadə ediləcəyi gözlənilir.
Modelin aerodinamik xüsusiyyətlərinə xüsusi diqqət ayrılacaq. Alçaq ön hissə və qısa arxa kuzov dizaynı hava müqavimətini azaltmağa, bununla da enerji sərfiyyatını optimallaşdırmağa xidmət edəcək.
Yeni Megane-ın ən diqqətçəkən xüsusiyyətlərindən biri yürüş ehtiyatı olacaq. İddialara görə, tam elektrikli və dörd təkərdən çəkişli versiya bir dəfə enerji doldurmaqla təxminən 748 kilometr məsafə qət edə biləcək.
Bundan əlavə, avtomobilin yürüş ehtiyatını artıran əlavə generatorla təchiz edilmiş versiyasının da hazırlanması nəzərdə tutulur. REx adlandırılan bu sistemdə daxiliyanma mühərriki təkərləri birbaşa hərəkətə gətirmək əvəzinə elektrik enerjisi istehsal edən generator funksiyasını yerinə yetirir. Belə versiyanın ümumi yürüş ehtiyatının 1400 kilometrə çatacağı gözlənilir.
Renault yeni modeldə batareya texnologiyasını da dəyişməyi planlaşdırır. Avtomobildə batareya elementlərinin birbaşa kuzovun konstruksiyasına inteqrasiya edildiyi cell-to-body texnologiyasından istifadə olunacaq. Bu yanaşma avtomobilin çəkisini azaltmağa və daxili məkanından daha səmərəli yararlanmağa imkan verir.
Renault-un texnologiya üzrə rəhbəri Filipp Brunenin sözlərinə görə, yeni platformada tutumu 90 kVt-saatdan az olan litium-dəmir-fosfat (LFP) batareyası nəzərdə tutulur. Şirkət avtomobilin ümumi çəkisini iki tondan aşağı saxlamağı hədəfləyir.
Yeni Megane RG EV Medium 2.0 adlı platforma üzərində hazırlanacaq. Bu arxitektura gələcəkdə daha təkmil avtonom idarəetmə texnologiyalarının tətbiqini dəstəkləmək üçün layihələndirilir.
Renault xüsusilə sükanla təkərlər arasında ənənəvi mexaniki əlaqəni elektron idarəetmə ilə əvəz edən steer-by-wire texnologiyasına diqqət yetirir. Şirkətin fikrincə, bu sistem gələcəkdə dördüncü səviyyəli avtonom idarəetməyə keçid üçün mühüm rol oynaya bilər.
Bununla belə, yeni Megane-ın təqdimat zamanı hansı səviyyədə avtonom idarəetmə imkanlarına malik olacağı hələ açıqlanmayıb.
Avtomobilin salonunda da ciddi yeniliklər gözlənilir. İddialara əsasən, interyer Renault E-Space konseptindən ilhamlanacaq. Ön panel boyunca uzanan geniş ekran, əlavə sensor idarəetmə paneli və təkmilləşdirilmiş səsli köməkçi sisteminin tətbiqi nəzərdə tutulur.
Əsas ekranın ön şüşəyə yaxın yerləşdirilməsi planlaşdırılır. Bununla sürücünün baxış istiqamətini daha az dəyişməsi və göz yorğunluğunun azaldılması hədəflənir.
Qeyd edək ki, Renault Megane ilk dəfə 1995-ci ildə Renault 19 modelinin əvəzedicisi kimi təqdim olunub. Model 2021-ci ildə Megane E-Tech Electric versiyasının debütü ilə elektrik avtomobilləri seqmentinə daxil olub.
Yeni nəsil Megane-ın 2028-ci ildə təqdim ediləcəyi gözlənilir. Lakin avtomobilin yekun dizaynı, texniki göstəriciləri, qiyməti və satış tarixi hələ rəsmi şəkildə təsdiqlənməyib. Yayımlanan rəqəmsal təsvirlər də Renault-un rəsmi dizaynı deyil, gözlənilən yeniliklər əsasında hazırlanmış konseptual görüntülərdir.
