Apple-ın 2027-ci ildə təqdim edəcəyi yeni smartfonlarla bağlı məlumatlar yayılıb. İddialara görə, şirkət iPhone 18, iPhone 18e və iPhone Air 2 modellərini gələn ilin mart və ya aprel ayında təqdim etməyi planlaşdırır. Yeni cihazların texniki xüsusiyyətləri ilə yanaşı, standart iPhone 18-in qiymətinin arta biləcəyi də bildirilir.
Apple 2026-cı ildən etibarən iPhone modellərinin təqdimat qrafikində dəyişiklik edib. Şirkət sentyabr ayında iPhone 18 Pro, iPhone 18 Pro Max və ilk qatlanan smartfonu iPhone Duo modellərini təqdim etdikdən sonra standart iPhone 18-in buraxılışını 2027-ci ilə saxlayıb.
Digital Chat Station (DCS) adlı insayderin yaydığı məlumata görə, iPhone 18 modeli 6,3 düymlük OLED ekranla təchiz ediləcək. Ekranın 1.5K təsvir ölçüsünü və 120 Hz yenilənmə tezliyini dəstəkləyəcəyi gözlənilir. Dizayn baxımından isə Apple-ın Dynamic Island elementini qoruyacağı bildirilir.
Yeni smartfonun əsas yeniliklərindən biri prosessor olacaq. İddialara əsasən, iPhone 18-də 2 nanometrlik istehsal texnologiyası əsasında hazırlanmış Apple A20 çipindən istifadə ediləcək. Bu prosessorun əvvəlki nəsillə müqayisədə daha yüksək məhsuldarlıq və enerji səmərəliliyi təmin edəcəyi gözlənilir.
Kamera sistemində isə ciddi dəyişiklik nəzərdə tutulmur. Smartfonun arxa hissəsində 48 meqapiksellik əsas kameranın daxil olduğu ikili kamera sistemi saxlanılacaq. Bununla yanaşı, batareyanın tutumunun artırılacağı da iddia edilir.
Yeni modelin qiyməti ilə bağlı məlumatlar isə istifadəçilər üçün o qədər də ürəkaçan deyil. Mənbənin iddiasına görə, Apple iPhone 18-in başlanğıc qiymətini artıra bilər. Lakin mümkün qiymət artımının məbləği hələ açıqlanmayıb.
Müqayisə üçün, ABŞ bazarında iPhone 17 modelinin başlanğıc qiyməti 899 dollar, iPhone 17e-nin 699 dollar, iPhone Air-in isə 1099 dollar olduğu bildirilir.
iPhone 18 ilə birlikdə təqdim ediləcəyi gözlənilən daha münasib qiymətli iPhone 18e modelinin də bəzi texniki xüsusiyyətləri məlum olub. İddialara əsasən, cihaz 6,12 düymlük OLED ekran, 60 Hz yenilənmə tezliyi və 48 meqapiksellik tək arxa kamera ilə təchiz ediləcək.
Bu modeldə də Apple A20 prosessorundan istifadə oluna bilər. Bundan əlavə, ön kameranın təsvir ölçüsünün 24 meqapikselə yüksəldilməsi ehtimal edilir.
iPhone Air 2 modelində isə daha geniş yeniliklər gözlənilir. Məlumata görə, smartfon 6,55 düymlük, 1.5K təsvir ölçülü və 120 Hz yenilənmə tezlikli OLED ekranla təchiz ediləcək.
Əvvəlki modeldən fərqli olaraq, iPhone Air 2-nin arxa hissəsində iki ədəd 48 meqapiksellik kameranın yerləşdiriləcəyi iddia olunur. Smartfonun batareya tutumunun artırılması və korpus qalınlığının 5,2 millimetr səviyyəsində saxlanılması da gözlənilir.
Yeni modelin Apple A20 Pro prosessoru, N2 simsiz rabitə çipi və C2 modemi ilə təchiz ediləcəyi bildirilir. Bu komponentlərin cihazın performansını və rabitə imkanlarını təkmilləşdirməsi nəzərdə tutulur.
İddialara əsasən, Apple hər üç smartfonu 2027-ci ilin mart və ya aprel ayında təqdim edəcək. Bununla belə, şirkət hələlik təqdimat tarixini, texniki xüsusiyyətləri və qiymətləri rəsmi şəkildə təsdiqləməyib.
