Apple analitiki Ming-Chi Kuonun sözlərinə görə, Apple iPhone çipi ilə təchiz edilmiş daha ucuz MacBook-u təqdim etməyi planlaşdırır. Beləliklə, ABŞ mərkəzli texnologiya nəhəngi daha çox flaqman seqmentə aid olan MacBook cihazlarını hər kəs üçün əlçatan etməyi hədəfləyir.
Uyğun qiymətə sahib MacBook, Apple-ın M seriyalı prosessoru əvəzinə iPhone 16 Pro seriyasından A18 Pro çipi ilə təchiz ediləcək. O, indiki MacBook Air ilə eyni 13 düymlük ekran ölçüsünə sahib olacaq. Gümüş, mavi, çəhrayı və sarı rənglərdə olacaq. Təbii ki, prosessorun dəyişdirilməsi özünü performans tərəfində çox büruzə versə də, qiymət-performans indeksinə görə qiymətləndirsək yenə də bu MacBook yüksək indeksə sahib ola bilər.
Bütün Apple Silicon ilə işləyən Mac-lər daha güclü M seriyasından istifadə etsə də, iPhone çipi də MacBook-u gücləndirmək üçün kifayət qədər güclüdür. Geekbench-də A18 Pro çipi bir nüvədə təxminən 3500 xal topladı. Bu, Mac mini-dəki M4 çipindən bir qədər aşağı xaldır. Çox nüvəli performansda daha böyük fərq var; A18 Pro, M4-ün 15,000 balına qarşı 8,780 xal toplayır. Bununla belə, A18-in çox nüvəli hesabı 2020-ci ildəki M1 çipi ilə rəqabətədavamlıdır və bu gün də bir çox insanlar istifadə edir. Qeyd edək ki, yeni MacBook-un 2025-ci ilin 4-cü rübündə və ya 2026-cı ilin birinci rübündə kütləvi istehsalına başlanacağı gözlənilir.
