Samsung brendinin Apple şirkəti ilə rəqabəti artıq hərkəsə məlumdur. Belə ki, texnologiya nəhəngləri daim performans və kamera kimi texniki cəhətlərdən mübarizə aparırlar. İndi isə məlum olub ki, Samsung iPhone Pro modelləri ilə rəqabət aparmaq üçün Galaxy S Ultra modelini təqdim edə bilər. Ümumiyyətlə gələn ilin əvvəlində Samsung brendinin yeni flaqman Galaxy S24 seriyasını təqdim edəcəyi hərkəsə məlumdur. Lakin indi diqqət bir neçə il sonra təqdim ediləcək smartfonlara çevrilib.
Cənubi koreyalı mənbənin verdiyi məlumata görə iPhone Pro modelləri ilə rəqabət aparacaq kompakt Galaxy S Ultra modeli performans tərəfində flaqman səviyyəsində olacaq. Yüksək səviyyəli xüsusiyyətlərin və daha kiçik çərçivənin bir araya gəlməsi ilə Samsung Apple brendi ilə daha bir seriyada rəqabət etməyə hazırlaşır. Qeyd edək ki, bu modeli Galaxy FE seriyasına əlavə etmək olar. Lakin bu smartfon əgər FE seriyasına əlavə ediləcəksə onun yüksək səviyyəli kamera xüsusiyyətlərinə sahib olma ehtimalı çox azdır.
Onu da qeyd edək ki, Samsung Galaxy S25 seriyasını təqdim etdikdən sonra bütün smartfonlarının dizayn dilini dəyişməyi düşünür. Beləliklə Galaxy S26 seriyasından sonra Samsung tamamilə fərqli dizayna keçid edə bilər. Həmçinin Cənubi koreya mərkəzli texnologiya nəhəngi Galaxy A seriyasına aid daha az smartfon təqdim edəcək. Görünən odur ki, Samsung indi flaqman seriyalarına daha çox fokuslanır.
