Bu mövzuya dair sonuncu dəfə 7 iyun tarixində dərc etdiyimiz xəbərə istinadən, Avropa Birliyi Type-C girişinin olmasına məcbur edən qanunu qəbul etmişdi. Qanunun qüvvəyə minməsi üçün isə yay tətilindən sonra parlament və şura sazişi rəsmi şəkildə təsdiq etməli idi. Nəhayət ötən gün Strasburqda baş tutan Avropa Birliyi Baş Assambleyasının keçdirdiyi sessiyasında qanun inanılmaz dərəcədə yüksək səs çoxluğu ilə təsdiqləndi. Qanuna görə USB Type-C girişi bütün cihazlar üçün yeni standart enerji girişinə çevriləcək. Bu 10 illiyin sonuna qədər kabelsiz həll yolları inkişaf etdikcə yavaş-yavaş yeni standartlar da bu istiqamətdə inkişaf etdiriləcək.
Sessiya çərçivəsində qanunun təsdiqi lehinə 602 səs verildi
Belə ki, qanunun təsdiq edilməsi üçün 602 nəfər lehinə, 13 nəfər əleyhinə, 8 nəfər isə bitərəf olmaqla səs verib. Nəticədə Avropa Birliyi tərəfindən Type-C girişinin standarta çevrilməsi təsdiqlənib. Rəsmi olaraq qeyd edilənə görə 2024-cü ilin sonuna qədər smartfonlar, planşetlər, elektron kitablar, klaviaturalar, kompüter siçanları, GPS cihazları, rəqəmsal kameralar, qulaqlıqlar və qulaqlıqla əlaqədar aksesuarlar, oyun konsolları, səs ucaldanlar məcburi olaraq USB Type-C tipli enerji girişinə sahib olmalıdır.
İyun ayında tam dəqiq bilinməsə də ötən gün noutbuklar üçün də qanunda müəyyən qeydlər edilib. 2026-cı ildən başlayaraq isə Avropa Birliyi tərəfindən təsdiqlənən qanuna əsasən noutbukların şarj cihazında da USB Type-C girişi standarta çevriləcək. Avropa Komissiyasının məlumatına görə, şarj cihazları hər il 11-13 ton e-tullantı yaradır. Yeni qanunun bu miqdarı kəskin şəkildə azaldacağı gözlənilir. Bu da ildə 250 milyon avro qənaət edilməsi deməkdir.
Qanundan ən çox təsirlənəcək istehsalçı isə Apple olacaq. Çünki, bazarda Apple xaricində demək olar bütün şirkətlər ya USB Type-C girişini istifadə edir, ya da məhsullarında USB Type-C təcrübəsinə sahibdir. Apple da müəyyən məhsullarında USB Type-C girişini quraşdırıb, lakin indiyə qədər iPhone modellərində şirkət bu texnologiyanı tətbiq etməyib. Ming-Chi Kuo və Mark Gurman kimi analitiklərin verdiyi məlumata görə Apple hal-hazırda USB Type-C girişinin iPhone modellərində tətbiqinin testlərini aparır. Avropa Birliyi bu qanunu ilə Type-C girişinə məcbur etsə də Apple şirkəti bütün girişlərdən imtina edərək, birbaşa naqilsiz şarj texnologiyaları ilə yoluna davam edə bilər.
