Hər dəfə Windows 11 əməliyyat sistemindəki xətalar düzəldi dedikdən sonra yeni bir probleml ortaya çıxır. Əgər xatırlayırısınızsa avqust ayında Windows 11 üçün xətaları düzəldən yeniləmə göndərildikdən sonra kompüterlərin performansında 2 qat azalma yaşanmışdı. SymCrypt təlimat kitabxanası əməliyyat sisteminə əlavə edilən yeni kodları düzgün işləmədiyi üçün istifadəçilərin bir çoxu performans itkisi yaşayırdılar. İndi isə bir müddət əvvəl yayımlanmış 22H2 yenilənməsində bəzi istifadəçilər bu dəfə də dolayı olaraq performansın təsirləndiyi fərqli bir xəta ilə üzləşiblər. Belə ki, Microsoft tərəfindən verilən məlumata görə faylların yüklənmə və kopyalanma sürəti yeniləmədən sonra 40% azalıb.
Microsoft özü də problemin nədən qaynaqlandığını aşkarlaya bilməyib
Yüklənmə və kopyalanma prosesinin sürətinin aşağı düşməsi halı ilkin ehtimallara görə SMB (server message block) protokolundakı xətadan qaynaqlanır. Lakin Windows Server mühəndislik qrupunun baş meneceri Ned Pyle, SMB protokolunda heç bir xətanın olmadığını bildirir. Ona görə də xətanın tam olaraq nədən qaynaqlandığı hələ də araşdırılır. Windows 11 əməliyyat sistemindəki yüklənmə və kopyalanma sürətinin aşağı düşməsi problemi isə internet bağlantısı ilə olan yükləmələrdə müşahidə edilməyib. Lakin iki fərqli kompüter arasında köçürmə etdikdə yenə yüklənmə sürətinin aşağı düşdüyü görülür.
Ned Pyle məsləhət görür ki, Windows 11 22H2 istifadəçikəri /J komandası ilə robocopy və ya komanda sətirlərindən yararlanaraq yüklənmə və kopyalanma prosesini həyata keçirsinlər. Çoxları bu komanda sətrindən istifadə etməsə də şirkətlərin böyük həcmli fayl transferində və.s problem yaşamaması üçün /J komandası işə yaraya bilər. Ned Pyle tərəfindən paylaşılan kod nümunəsi isə aşağıdakı kimidir.
robocopy \\someserver\someshare c:\somefolder somefile.ned /J
Windows 11 22H2 ilə yaşanan tək problem yüklənmə və kopyalanma sürətinin 40% aşağı düşməsi deyil. Microsoft eyni zamanda bəzi istifadəçilərdə printerlərin düzgün işləməməsi ilə bağlı da xətaların yaşanacığını təsdiqləyib. Şirkət hal-hazırda bütün bu problemləri həll edəcək yeniləmə üzərində işləyir. Lakin yeniləmənin nə vaxt istifadəyə veriləcəyi naməlumdur. Ümid edirik, yeniləmə ilə bu problemi həll edib yeni bir problem ortaya çıxarmayacaqlar.
