Xiaomi avtomobil dünyasındakı hərəkətlərini sürətini azaltmadan davam etdirir. Çin şirkəti sektordakı iddiasını bir addım da irəli apararaq ilk elektrikli SUV modelini təqdim edib. Çində rəsmiləşən Xiaomi YU7, ilk sedan SU7-dən sonra Çinli brendin ikinci elektrik avtomobilidir.
İyun ayından satışa çıxarılması planlaşdırılan avtomobil aerodinamik dizaynı ilə Ferrari Purosangue-i xatırladır. Onun uzun kapotu, əyri dam xətti, qabarıq qanadları və iti arxa ucu ilə bu oxşarlığı dəstəklədiyini görə bilərik. Ön tərəfdə gözə çarpan burun və oxa bənzər fənərlər diqqəti cəlb edərkən, arxada LED zolaqları ilə bir-birinə bağlanan arxa fənərlər avtomobilə müasir hava qatır. Orta ölçülü yolsuzluq avtomobili kimi yerləşdirilən avtomobilin salonunda Nappa dəri üzlükləri var. Kokpitə baxdığımız zaman alət panelinin ön konsol boyunca uzanan nazik ekranla həll edildiyini görürük.
Multimedia sistemi Snapdragon 8 Gen 3 platformasına həvalə edilib. Elektron sürücü köməkçiləri üçün 700 TOPS hesablama gücünə malik Nvidia Drive AGX Thor çipi istifadə olunur. Ön oturacaqlarda elektrik tənzimlənməsi, isitmə, ventilyasiya və masaj kimi rahatlığı ən yüksək səviyyəyə qaldıran xüsusiyyətlər var. 508 litrlik baqaj həcmi də gündəlik istifadə üçün kifayət hesab oluna bilər. Qeyd edək ki, elektromobil 3 fərqli versiyada debüt edir, bunlar müvafiq olaraq Baza, Pro və Max olaraq təyin edilib. Baza adlanan arxa ötürücülü versiyada 320 at gücü hasil edən tək elektrik mühərriki mövcuddur. Hansı ki, bu mühərrik avtomobilin 0-100 km/saat göstəricisini 5.9 saniyə edir. Bu versiyada Xiaomi YU7 240 km/saat maksimal sürətə və 96.3 kVt/saat litium-dəmir fosfat batareya ilə 835 km mənzilə sahibdir.
Pro versiya tam ötürücülüdür və iki elektrik mühərriki burada 496 at gücü hasil edir. Maksimal sürət baza modeli ilə eyni olsa da, bu model 100 km/saat sürətinə 4.3 saniyəyə çatır. Bu model ilə eyni batareya ilə 770 km mənzil vəd edir. Max versiya seriyanın ən güclüsü hesab olunur və 691 at gücü hasil edən 2 elektrik mühərrikinə sahibdir. Bununla yanaşı onun maksimal sürəti 253 km/saatdır və 100 km/saat sürətinə cəmi 3.2 saniyəyə çata bilir. Bu versiyada batareya həcmi 101.7 kVt/saat-a qədər artırılıb və mənzil 760 km olaraq təyin edilib. 800 voltluq arxitekturaya malik olan YU7 sürətli enerji doldurma baxımından da kifayət qədər iddialıdır. Cəmi 12 dəqiqəlik şarjla 620 kilometr məsafə qət etmək mümkündür. Avtomobil həmçinin 21 düymlük təkər diskləri, Brembo əyləcləri və lidar dəstəkli yarı avtonom idarəetmə sisteminə malikdir. Xiaomi YU7-nin qiyməti və digər təfərrüatları onun iyun ayında buraxılış tarixinə yaxınlaşdıqca aydınlaşacaq.
