Çin-in Tiangong Kosmik Stansiyasında aparılan mikrobioloji araşdırmalar nəticəsində Yer kürəsində daha əvvəl rast gəlinməyən yeni bakteriya növü aşkar edilib. Alimlər bu yeni mikroorqanizmə “Niallia tiangongensis” adını veriblər. Adını stansiyanın özündən alan bu bakteriya daha əvvəl məlum olan torpaq bakteriyasının kosmosda təkamül yolu ilə inkişaf etmiş bir variantı kimi diqqəti çəkir.
Çin alimləri tərəfindən yeni kəşf edilən bu bakteriya 2023-cü ildə Shenzhou-15 missiyası çərçivəsində astronavtlar tərəfindən stansiyanın müxtəlif modullarından toplanan nümunələr sayəsində aşkar edilib. Steril tamponlarla toplanan bu nümunələr dondurularaq Yerə geri göndərilib və burada ətraflı təhlillər aparılıb. Araşdırmalar, bakteriyaların Niallia circulans adlı bir növlə yaxından əlaqəli olduğunu, normal olaraq torpaqda, kanalizasiya sistemlərində və bəzi qidalarda rast gəlindiyini və immun sistemi zəif olan insanlarda sepsisə səbəb ola biləcəyini ortaya çıxarır. Bununla belə, Niallia tiangongensis yüksək radiasiya və aşağı çəkisi kimi kosmosun ekstremal şərtlərinə uyğunlaşmaq üçün bəzi genetik fərqlər inkişaf etdirmişdir.
Mütəxəssislərin fikrincə, bu yeni bakteriya oksidləşdirici stresə qarşı müqavimət, radiasiya zədələnməsini bərpa etmək və jelatini parçalamaqla karbon və azot əldə etmək kimi qabiliyyətlərlə təchiz edilib. Bundan əlavə, onun səthlərə yapışmasına və çoxalmasına imkan verən biofilmlər əmələ gətirmə qabiliyyəti uzunmüddətli kosmik missiyalar üçün xüsusi əhəmiyyət kəsb edir. Mütəxəssislər bildirirlər ki, belə mikroorqanizmlər həm astronavtın sağlamlığı, həm də kosmik gəmilərin bütövlüyü üçün təhlükə yarada bilər. Lakin bakteriyanın insanlar üçün təhlükəli olub-olmadığı hələlik bəlli deyil. Ancaq yeni bakteriyalar kosmosda ilk dəfə deyil. 2018-ci ildə NASA Beynəlxalq Kosmik Stansiyanın tualetlərində antibiotiklərə davamlı dörd yeni bakteriya ştammı aşkar edib. Bu bakteriyaların da yaşamaq strategiyaları arasında unikal genetik uyğunlaşmaları var idi.
